Waziri Mkuu Aanza ziara Mkoa wa Mara

Posted on: February 25th, 2024

Waziri Mkuu wa Jamhuri ya Muungano wa Tanzania Mhe. Kassim Majaliwa Majaliwa (Mb.) leo amewasili katika Mkoa wa Mara tayari kwa kuanza ziara ya siku tano katika Mkoa wa Mara kuanzia tarehe 25 Februari, 2025 hadi tarehe 29 Februari, 2024.

Mara baada ya kuwasili, Mhe. Majaliwa amepokelewa katika Ikulu ndogo ya Musoma na baadaye kupokea taarifa ya Mkoa wa Mara kutoka kwa Mkuu wa Mkoa wa Mara Mhe. Said Mohamed Mtanda na kusalimiana na viongozi mbalimbali wa Mkoa wa Mara walioshiriki mapokezi hayo.

Kesho tarehe 26 Februari, 2024 Mhe. Waziri Mkuu anategemea kufanya ziara katika Wilaya ya Bunda ambapo atasalimia wananchi katika eneo la Mariwanda kabla ya kutembelea na kukagua Shule ya Msingi Sabasita, atakagua na kuweka jiwe la msingi katika mradi wa ujenzi wa Shule ya Sekondari ya Wasichana ya Mkoa wa Mara katika Halmashauri ya Wilaya ya Bunda.

Baada ya hapo Mhe. Waziri Mkuu atakagua na kuzindua mradi wa maji wa Sazira na kufanya kikao na watumishi na viongozi na hatimaye kufanya mkutano wa hadhara katika uwanja wa Shule ya Msingi Miembeni, Halmashauri ya Mji wa Bunda.