TAMISEMI yataka mbinu shirikishi katika ufundishaji

Posted on: June 24th, 2024

Naibu Katibu Mkuu wa Ofisi ya Rais, Tawala za Mikoa na Serikali za Mitaa (TAMISEMI) anayeshughulikia Elimu Dkt. Charles Msonde leo (Juni 21, 2024) amefanya ziara katika Wilaya ya Serengeti na kuwataka walimu wa darasa la kwanza na darasa la pili kutumia mbinu shirikishi katika ufundishaji wa wanafunzi.

Akizungumza katika kikao kazi na wasimamizi wa elimu Wilaya ya Serengeti ambapo amewasistiza walimu kuepuka kufundisha kwa mazoea hasa kwa darasa la kwanza na la pili kwa shule za msingi na Kidato cha kwanza.

“Mbinu shirikishi zikitumika kwa wanafunzi wa madarasa ya chini zitaleta ufanisi na matokeo chanya wakati watoto wanapoendelea na masomo yao katika ngazi za juu” amesema Dkt. Msonde.

Aidha, Dkt. Msonde amewataka walimu wanaofundisha somo la kiingereza shule za msingi kuongeza bidii na maarifa katika ufundishaji wa somo hilo kwani linachangamoto kutokana na wanafunzi wengi wamekuwa wakikaririshwa maneno magumu ya kiingereza bila kuelewa kile walichokariri.

Dkt. Msonde amewataka walimu kuwaandaa watoto kuanzia katika madarasa ya awali, darasa la kwanza, la pili na la tatu kwani kwa kufanya hivyo kutamjengea mtoto msingi mzuri tangu akiwa katika madarasa ya chini.

Kikao kazi hicho kilihudhuriwa na Maafisa Elimu kutoka ngazi ya Mkoa, Mkurugenzi wa Halmashauri ya Wilaya ya Serengeti, Halmashauri ya Wilaya ya Serengeti, Maafisa Elimu Kata na  Wakuu wa Shule za Sekondari na Walimu Wakuu wa Shule za Msingi kutoka Halmashauri ya Wilaya ya Serengeti.   

Dkt. Msonde kesho anatarajiwa kuendelea na ziara yake katika Wilaya ya Wilaya ya Tarime   Mkoa wa Mara.