RC awapokea Madaktari Bingwa wa Mama Samia 64 Mara

Posted on: October 13th, 2025

Mkuu wa Mkoa wa Mara Mhe. Kanali Evance Alfred Mtambi leo tarehe 13 Oktoba, 2025 amewapokea  madaktari bingwa na bobezi maarufu kama Madaktari Bingwa wa Mama Samia 64 waliofika Mkoa wa Mara kuanza kambi maalum ya madaktari wa Mama Samia watakaotoa huduma katika Hospitali za Halmashauri za Mkoa wa Mara.

Akizungumza katika mapokezi hayo, Mhe. Mtambi amemshukuru Rais wa Jamhuri ya Muungano wa Tanzania Dkt. Samia Suluhu Hassan kwa uwekezaji mkubwa alioufanya katika sekta ya afya unaoruhusu kuanzishwa kwa programu ya kuwapelekea madaktari bingwa katika Hospitali za Halmashauri na Vituo vya Afya.

“Mhe. Rais amefanya uwekezaji mkubwa katika miundombinu ya msingi katika vituo vya kutolea huduma za afya katika Mkoa wa Mara jambo ambalo linawezesha madaktari bingwa kufanyakazi vizuri katika vituo hivyo” amesema Mhe. Mtambi.

Mhe. Mtambi amesema huduma za kibingwa na kibobezi zinaposogezwa jirani na wananchi zinasaidia kuokoa muda na fedha za wananchi kwa ajili ya usafiri, kuokoa maisha na kuzuia ulemavu kwa wagonjwa na kuongeza mapato ya Halmashauri husika.

“Wagonjwa wengi wanapoteza maisha wakiwa njiani kuelekea hospitali kubwa kwa ajili ya kupata matibabu ya kibingwa na Mhe. Rais kaliona hili na kuamua kuwaleta madaktari bingwa na bobezi ndani ya kilometa 30 ili kuokoa maisha” amesema Mhe. Mtambi.

Mhe. Mtambi amesema katika awamu tatu zilizopita kambi za madaktari bingwa zimefanyika kwa mafanikio makubwa na kuwasistiza Waganga Wakuu wa Halmashauri kusimamia utoaji wa huduma, ukusanyaji wa mapato na kuwasilisha taarifa kila siku Ofisi ya Mkuu wa Mkoa wa Mara kuhusiana na utekelezaji wa zoezi hilo.

Mhe. Mtambi ametumia fursa hiyo kuwahamasisha wananchi wa Mkoa wa Mara kushiriki uchaguzi mkuu wa mwaka 2025 kwa kujitokeza kwa wingi kushiriki kampeni za uchaguzi zinazoendelea na kupiga kura tarehe 29 Oktoba, 2025.

Kwa upande wake, Katibu Tawala wa Mkoa wa Mara Ndugu Gerald Musabila Kusaya amewakaribisha madaktari hao Mkoa wa Mara na kuwahakikishia mazingira mazuri ya kufanyiakazi na upatikanaji wa vitendea kazi.

Ndugu Kusaya amewataka madaktari bingwa na bobezi wanaohitaji kubaki katika Mkoa wa Mara kumtaarifu ili taratibu za kuwahamisha ziweze kufanyika.  

Kwa upande wake, Katibu Tawala Msaidizi Sehemu ya Afya, Lishe na Ustawi wa Jamii Dkt. Zabron Masatu amesema hii ni awamu ya nne madaktari bingwa na bobezi wanapolelewa katika Mkoa wa Mara kuanzia Juni, 2026 na mpaka sasa takriban wagonjwa 6,000 wameonwa na madaktari hao.

Dkt. Masatu amesema madaktari hao watawaona wagonjwa wenye changamoto mbalimbali na kufanya upasuaji pale unapohitajika na kati ya wataalamu hao kila kituo kitakachofikiwa kitapata madaktari bingwa watano wa magonjwa mbalimbali na muunguzi mbobezi mmoja.

Kwa upande wake Mratibu wa Kambi ya madaktari Bingwa kutoka Wizara ya Afya Dkt. Grace Mariki amesema katika awamu hii, Wizara ya Afya imeleta madaktari bingwa na bobezi 64 na watafanyakazi kuanzia leo tarehe 13 hadi 17 Oktoba, 2025 katika Hospitali zote za Halmashauri za Mkoa wa Mara na kituo cha Afya Ikizu na Kasahunga katika Halmashauri ya Wilaya ya Bunda.

Dkt. Mariki amewataka wananchi wote wa Mkoa wa Mara kuchangamkia fursa hiyo adhimu na kupata huduma za matibabu za kibingwa na bobezi karibu na maeneo yao.

Hafla ya mapokezi hayo imefanyika katika ukumbi wa uwekezaji na kuhudhuriwa pia na Menejimenti ya Sekretarieti ya Mkoa wa Mara, Maafisa kutoka Wizara ya Afya na Timu ya Usimamizi wa Sekta ya Afya katika Mkoa wa Mara na Waganga Wakuu wa Halmashauri.