Mtanda ashiriki mazishi ya Mkono

Posted on: May 30th, 2023

Mkuu wa Mkoa wa Mara Mhe. Said Mohamed Mtanda leo ameshiriki mazishi ya Mhe. Nimrod Elirehema Mkono aliyekuwa Mbunge wa Jimbo la Musoma Vijijini na baadaye Butiama na Wakili maarufu hapa nchini aliyefariki dunia tarehe 18 Aprili, 2023 nchini Marekani.

Akizungumza katika mazishi ya Mhe. Mkono,  Mhe. Mtanda ametoa pole kwa wafiwa wote waliofikwa na msiba huo na kumshukuru Mhe. Mkono kwa mchango mkubwa alioutoa kwa maendeleo ya Mkoa wa Mara.

Mhe. Mtanda pia ametumia fursa hiyo  kuwakaribisha waombolezaji wote waliofika katika Mkoa wa Mara kushiriki mazishi hayo kutoka sehemu mbalimbali na kuwahakikishia usalama wakati wote wanapokuwa katika Mkoa wa Mara.

Wakuu wa Mikoa wengine walioshiriki mazishi hayo ni Mkuu wa Mkoa wa Simiyu Dkt. Yahaya Nawanda; Mkuu wa Mkoa wa Njombe Mhe. Antony Mtaka;  Mkuu wa Mkoa wa Simiyu Mhe. Martin Shigela;  na Mkuu wa Mkoa wa Mtwara Kanali Ahmed Abbas Ahmed.

Viongozi wengine waliohudhuria mazishi hayo ni pamoja na Waziri wa Ardhi, Nyumba na Maendeleo ya Makazi Mhe. Angelina Mabula, Waziri wa Elimu, Sayansi na Teknolojia Prof. Adolf Mkenda, Mwenyekiti wa Jumuiya ya Wazazi Taifa (CCM) Mhe.Fadhili Maganya. Mwenyekiti wa CCM Mkoa wa Mara Mhe. Patrick Chandi Marwa.

Mwili wa Marehemu Mkono uliletwa nchini Tanzania tarehe 27 Mei, 2023 na tarehe 28 Mei, 2023 uliagwa rasmi katika ukumbi wa Karimjee Jijini Dar es Salaam na baadaye kusafirishwa kuja Busegwe, Butiama kwa mazishi ambayo yamefanyika leo.

Mhe. Mkono alizaliwa mwaka 1943 katika Kijiji cha Busegwe Wilaya ya Butiama, akiwa ni mtoto wa tano kati ya watoto tisa wa familia yam zee Ezekiel Mkono.  

 Mhe. Mkono ambaye ni mmiliki na mwanzilishi wa Kampuni ya Uwakili ya Mkono  and Co. Advocates na Benki ya Biashara ya Bank M alikwenda nchini Marekani kwa matibabu mwaka 2018 na amefariki katika Jimbo la Florida akiwa na umri wa miaka 79.