Mtambi awataka wakulima Bunda na Musoma kuchangamkia fursa ya kilimo cha choroko

Posted on: October 24th, 2025

Mkuu wa Mkoa wa Mara Mhe. Kanali Evans Alfred Mtambi leo tarehe 24 Oktoba, 2025 amegawa mbegu za Choroko kwa Halmashauri za Wilaya ya Bunda na Halmashauri ya Wilaya ya Musoma na kuwataka wakulima wa Halmashauri hizo kuchangamkia fursa ya kilimo cha zao la choroko.

Akizungumza katika hafla ya kugawa mbegu hizo zilizotolewa na Mamlaka ya Udhibiti wa Nafaka na Mazao Mchanganyiko (COPRA) kwa wakulima wa Halmashauri hizo, Mhe. Mtambi amewataka wakulima kutumia mbegu bora za choroko zilizotolewa bure na Serikali na kuwatumia vizuri wataalamu wa kilimo ili kuboresha maisha yao.

“Fursa hii imeletwa na Serikali kuhakikisha kuwa inawanufaisha Watanzania, wakulima tutumie fursa hii kuongeza uzalishaji wa choroko ili kuimarisha upatikanaji wa chakula na kujiimarisha kiuchumi” amesema Mhe. Mtambi.

Aidha, Mhe. Mtambi ameupongeza mfumo wa stakabadhi ghalani ambao unatumika katika mauzo ya mazao mbalimbali ikiwemo choroko kuwa ni mkombozi kwa wakulima kwa kuwaletea bei nzuri ya mazao ikilinganishwa na mauzo nje ya mfumo huo.

Mhe. Mtambi amesema Mkoa wa Mara umejipanga kuongeza uzalishaji wa choroko kutoka kilo 108,151 za mwaka 2025 hadi 150,000 kwa mwaka 2026 na zaidi ya kilo 500,000 kwa miaka michache ijayo kwa kuwahamasisha wakulima wote wa Mkoa wa Mara kulima zao hilo.

Mhe. Mtambi amesema Mkoa wa Mara ni kati ya Mikoa inayofanya vizuri katika kilimo cha mazao ya choroko, mbaazi na dengu na kuishukuru Mamlaka ya Udhibiti wa Nafaka na Mazao Mchanganyiko (COPRA) kwa kutoa mbegu za choroko kwa wakulima wa Mkoa wa Mara.

Wakati huo huo, Mhe. Mtambi ametumia fursa hiyo kuwahamasisha wananchi wa Mkoa wa Mara kujitokeza kwa wingi kupiga kura tarehe 29 Oktoba, 2025 ili kutimiza haki yao ya kikatiba kuwachagua viongozi watakaowaongoza kwa miaka mitano ijayo.

Mhe. Mtambi amewataka wananchi kuondoa hofu ya kutokea vurugu na kuwahakikishia usalama wakati wote na baada ya uchaguzi mkuu wa mwaka 2025 utakaofanyika hapa nchini Jumatano ijayo kuanzia asubuhi hadi jioni.

Kwa upande wake, Katibu Tawala Msaidizi Sehemu ya Uchumi na Uzalishaji Ndugu Mwita Okayo amesema Mkoa umepokea mbegu za choroko tani moja kutoka Mamlaka ya Udhibiti wa Nafaka na Mazao Mchanganyiko (COPRA) kwa ajili ya Halmashauri ya Wilaya ya Bunda na Halmashauri ya Wilaya ya Bunda.

Ndugu Okayo amesema kwa kugawa mbegu hizo Mkuu wa Mkoa amezindua rasmi msimu wa kilimo wa  vuli na baadaye katika wiki ya pili ya Novemba, 2025 Mhe. Mkuu wa Mkoa atazindua msimu wa kilimo cha pamba katika Mkoa wa Mara.

Ndugu Okayo amesema Mkoa unampango wa kuboresha kilimo cha zao la choroko katika Halmashauri zote za Mkoa wa Mara jambo ambalo litaongeza uzalishaji wa zao hilo kutoka tani laki moja za sasa hadi tani laki tano kwa miaka michache ijayo.

Hafla ya kukabidhi mbegu za choroko imefanyika katika Ofisi ya Mkuu wa Mkoa wa Mara na kuhudhuriwa na maafisa kutoka Ofisi ya Mkuu wa Mkoa wa Mara, COPRA, Halmashauri za Wilaya ya Bunda na Musoma.