Mtambi afanya ziara Bunda

Posted on: June 27th, 2024

Mkuu wa Mkoa wa Mara Mhe. Kanali Evans Alfred Mtambi leo tarehe 26 Juni, 2024 amefanya ziara kwa mara ya kwanza katika Halmashauri ya Wilaya ya Bunda ambapo akiwa katika Halmashauri hiyo amekagua miradi ya maendeleo, kuzungumza na watumishi na kushiriki kikao cha Baraza cha kujibu hoja za Mkaguzi na Mdhibiti Mkuu wa Hesabu za Serikali (CAG).

Mhe. Mtambi ameanza ziara yake kwa kutembelea na kukagua mradi wa ujenzi wa shule ya Sekondari ya Wasichana ya Mkoa wa Mara inayojengwa katika Halmashauri hiyo na kumwagiza Mkuu wa Wilaya kuhamia kwa muda katika shule hiyo inayotarajiwa kuanza kupokea wanafunzi wa kidato cha tano kuanzia tarehe 30 Juni, 2024.

“Ninataka uhamie hapa ili kusimamia usafi wa mazingira, marekebisho ya baadhi ya maeneo niliyoagiza na ukamilishaji wa utengenezaji wa samani kwa ajili ya wanafunzi” amesema Mhe. Mtambi na kuitaka Halmashauri hiyo kuyafanyia kazi maagizo yake aliyoyatoa.  

Baada ya hapo, Mhe. Mtambi ametembelea na kukagua mradi wa ujenzi wa nyumba ya Mkurugenzi wa Halmashauri na nyumba ya wakuu wa idara zinazoendelea kujengwa katika eneo la Mumagunga, Kibara na kuagiza Halmashauri kukamilisha mradi huo haraka ili Mkurugenzi aweze kuhamia.    

Akiwa kwenye mradi huo, Mkuu wa Mkoa amepongeza ubora wa ujenzi wa mradi huo ambao umefikia asilimia 95 ya utekelezaji  na kutoa muda wa miezi miwili Mkurugenzi wa Halmashauri hiyo awe amehamia na kuleta taarifa ofisini kwake za utekelezaji wa agizo hilo.    

Aidha, Mkuu wa Mkoa pia amekagua maendeleo ya ujenzi wa jengo la ofisi ya Halmashauri ya Wilaya ya Bunda na kumtaka mkandarasi wa mradi huo Suma JKT kukamilisha mradi huo kwa haraka.

Kanali Mtambi ameitaka Halmashauri ya Wilaya ya Bunda kusafisha mazingira kuzunguka mradi huo na kuandaa upatikanaji wa mahitaji ya ujenzi ili kumrahisishia mkandarasi wa mradi huo kutekeleza mradi  kwa wakati.

Akiwa Halmashauri ya Wilaya ya Bunda pia Mhe. Mtambi amezungumza na wafanyakazi wa Halmashauri hiyo na kuwakumbusha kufanyakazi kwa bidii na weredi na kuongeza ubunifu ili kuwatumikia kwa ufanisi wananchi.

Mkuu wa Mkoa amehitimisha ziara yake kwa kuhudhuria kikao maalum cha Baraza la Madiwani kwa ajili ya kujadili hoja za CAG  vikao vilivyofanyika katika ukumbi wa Halmashauri ya Wilaya ya Bunda.

Katika ziara hiyo, Mkuu wa Mkoa aliambatana na Katibu Tawala wa Mkoa, Kamati ya Usalama ya Wilaya ya Bunda, Baraza la Madiwani wa Halmashauri ya Wilaya ya Bunda, maafisa kutoka Sekretarieti ya Mkoa wa Mara na Halmashauri ya Wilaya ya Bunda.