Magari haya yatumike kuwahudumia wananchi: Mtambi

Posted on: July 12th, 2024

Mkuu wa Mkoa wa Mara Mhe. Kanali Evans Alfred Mtambi leo tarehe 11 Julai, 2024 amekabidhi magari yaliyotolewa na Rais wa Jamhuri ya Muungano wa Tanzania Mhe. Samia Suluhu Hassan kwa Wakuu wa Wilaya na kuwataka kutumia magari hayo katika kuwahudumia wananchi.

Akizungumza katika hafla fupi ya makabidhiano ya magari hayo Mhe. Mtambi amemshukuru Mhe. Rais kwa kuwapatia Wakuu wa Wilaya Magari hayo ambayo yatawasaidia kuwafikia wananchi na kukagua miradi ya maendeleo inayotekelezwa katika maeneo yao.

“Magari haya yatumike kwa mujibu wa maelekezo ya Serikali ya kusikiliza na kutatua kero za wananchi  na kukagua miradi ya maendeleo inayotekelezwa katika maeneo yenu” amesema Mhe. Mtambi.

Aidha, amewataka Wakuu wa Wilaya kuhakikisha magari hayo yanatunzwa na kuwekwa katika hali nzuri ili yadumu na kutoa huduma kwa wananchi kwa muda mrefu.

Kwa upande wake, Katibu Tawala wa Mkoa wa Mara Bwana Gerald Musabila Kusaya ameeleza kuwa katika awamu hii, Wakuu wa Wilaya za Bunda, Serengeti na Rorya ndio wamepewa magariyaliyopangwa katika bajeti ya mwaka 2023/2024.

Bwana Kusaya amesema Wakuu wa Wilaya za Musoma, Tarime na Butiama wanatarajiwa kupatiwa magari katika bajeti ya mwaka wa fedha 2024/2025.

Bwana Kusaya amemuomba Mkuu wa Mkoa kuyazindua na kuyakabidhi magari hayo ili yaanze kutumika katika kuwahudumia wananchi wa wilaya hizo.  

Kwa upande wake, Mkuu wa Wilaya ya Serengeti Mhe. Dkt. Vincent Mashinji amemshukuru Mhe. Rais kwa kutoa magari hayo na kuondoa changamoto ya magari waliyokuwa nayo katika utekelezaji wa majukumu yao.

Dkt. Mashinji amesema magari hayo yatawasaidia kuwatembelea na kusikiliza kero za wananchi na kukagua miradi ya maendeleo iliyopo katika Wilaya zetu na kuwataka madereva kuyatunza magari hayo ili yaweze kudumu muda mrefu.