Kiongozi wa Mbio za Mwenge wa Uhuru kitaifa awasha Mwenge wa Mwitongo kwa mara ya 61

Posted on: August 18th, 2025

Kiongozi wa Mbio za Mwenge Kitaifa Ndugu Ismail Ali Ussi leo tarehe 18 Agosti, 2025 ameongoza tukio la Mwenge wa Uhuru kuwasha Mwenge wa Mwitongo nyumbani kwa Baba wa Taifa, Mwalimu Julius Kambarege Ntyerere, eneo la Mwitongo, Butiama.

Ndugu Ussi amewasha Mwenge wa Mwitongo kwa mara ya 61 tangu mbio za mwenge wa Uhuru zilivyoanzishwa mwaka 1964 huku akiwa ameambatana na wakimbiza Mwenge wa Uhuru kitaifa, wazee wa kimila na familia ya Mwalimu Nyerere.

Nyumbani kwa Baba wa Taifa viongozi wa Mwenge wa Uhuru wamepata taarifa za kihistoria kuhusu Mwenge wa Mwitongo, Baba wa Taifa na familia yake pamoja na kuzuru kaburi la Baba wa Taifa na kuweka mashada na kutembelea Makumbusho ya Mwalimu Nyerere Butiama.

Nyumbani kwa Baba wa Taifa, Mwenge umepokelewa na wanafamilia wa Mwalimu Nyerere wakiongozwa na Chifu Japheti Wanzagi kiongozi wa familia ya Mwalimu Nyerere na kiongozi wa kabila la Wazanaki.

Wakati huo huo, Mwenge wa Uhuru umepitia miradi nane ya maendeleo katika Wilaya ya Butiama yenye thamani ya shilingi 3,767,195,293.00 na kati ya gharama hizo fedha za wananchi ni shilingi 1,288,582,500.00; mchango wa Halmashauri ni shilingi 45,000,000.00 na fedha za Serikali Kuu ni 2,433, 612,793.00.

Baada ya kupokelewa katika uwanja wa Shule ya Msingi Nyabange, Mwenge wa Uhuru umeweka jiwe la msingi Kituo cha Afya Wegero; umefungua Shule ya Sekondari ya Sirorisimba na kukagua upandaji wa miti katika eneo hilo; umezindua kituo cha mafuta Isaka; na kuweka jiwe la msingi katika mradi wa mtandao wa maji wa Kijiji cha Nyambili.

Aidha, Mwenge wa Uhuru umezindua daraja la Buturu- Mwanzaburiga na kutembelea mradi wa vijana waendesha bodaboda eneo la Nyasirori na kuweka jiwe la msingi mradi wa machinjio ya Halmashauri ya Wilaya ya Butiama.

Mwenge wa Uhuru umehitimisha mbio zake katika Uwanja wa Mwenge Butiama ambapo mkesha wa Mwenge wa Uhuru unaendelea. Ukiwa katika eneo la mkesha, Mwenge wa Uhuru utakagua kongamano la vijana; shughuli za lishe; kukagua shughuli za kuzuia na kupambana na rushwa; kupokea taarifa za maandalizi ya uchaguzi; kukagua utoaji wa elimu na shughuli za kuzuia dawa za kulevya; kukagua mabanda ya wajasiriamali na kupokea risala ya utii.  

Kesho tarehe 19 Agosti, 2025 Mwenge wa Uhuru unatarajiwa kuendelea na mbio zake katika Wilaya ya Rorya ambapo makabidhiano yatafanyika katika eneo la Kinesi.