DC Chikoka afungua semina ya michongo kwa maafisa usafirishaji Musoma

Posted on: December 3rd, 2025

Mkuu wa Wilaya ya Musoma Mhe. Juma Chikako leo tarehe 03 Desemba, 2025 amemwakilisha Mkuu wa Mkoa wa Mara katika uzinduzi wa Semina michongo (fursa) iliyotolewa kwa maafisa usafirishaji wa Manispaa ya Musoma uliofanyika katika ukumbi wa Chuo Kikuu Huria.

Akizungumza wakati wa uzinduzi wa kampeni hiyo, Mhe. Chikoka amesema lengo la semina hiyo ni kuwapatia fursa za kiuchumi zitakazoweza kuwaongezea kipato maafisa usafirishaji hao na kuwataka kuachana na vitendo vinavyoweza kuhatarisha Amani.

“Ndugu zangu michongo hii mkiizingatia mnaweza kufanikiwa kiuchumi ninyi na familia zenu na kuimarisha uchumi wa Taifa letu” amesema Mhe. Chikoka na kuwataka maafisa usafirishaji hao kuchangamkia fursa zilizopo ili kuboresha maisha yao.

Mhe. Chikoka amezitaja fursa zilizopo ni pamoja na mikopo yenye riba nafuu, mafunzo ya udereva yaliyopunguzwa bei yatakayotolewa na Chuo cha VETA Mara na bima mbalimbali ambazo amesema Serikali imezitoa kwao na hivyo wakitaka kubadili maisha yao wazichangamkie fursa hizo  zitakazoanza kutolewa kuanzia tarehe 5 Desemba, 2025.

Mhe. Chikoka amewataka maafisa usafirishaji hao ambao wanajumuisha madereva wa pikipiki na bajaji  kuwa mabalozi wa amani na kuacha kujihusisha na vitendo ambavyo vinavyochochea uvunjifu wa amani katika Mkoa wa Mara.

“Maandamano sio dili, dili ni michongo ya maendeleo itakayowawezesha kujikwamua kiuchumia” amesema Mhe. Chikoka na kuongeza kuwa semina hiyo itawasaidia kuzifahamu fursa zilizopo na kuzichangamkia.   

Mhe. Chikoka amesema kwa sasa Serikali inaimarisha miundombinu ya usafirishaji katika Mkoa wa Mara ikiwa ni pamoja na ujenzi wa stendi ya mabasi ya Bweri, barabara, uwanja wa ndege wa Musoma na Serengeti na kadhalika ili kuboresha maisha ya wananchi.

Kwa upande wake, Meneja wa Benki ya NMB Tawi la Musoma amesema benki hiyo inatoa mikopo yenye riba nafuu ikiwemo mikopo ya pikipiki ambapo mkopaji anachangia asilimia 20 ya thamani ya pikipiki hiyo pamoja na mikopo ya fedha taslimu zinazotolewa kwa wajasiriamali wadogo wadogo.

Meneja huyo amewashauri Maafisa Usafirishaji hao kufungua akaunti ya NMB Pesa ili kuweza kuwarahisishia upatikanaji wa mikopo inayotolewa na benki hiyo.

Kwa upande wake, Mwakilishi wa LATRA amewataka maafisa usafirishaji hao kuzingatia sheria na taratibu za usalama barabarani.

 Taasisi zilizoshiriki katika semina hiyo ni pamoja na Shirika la Bima la Taifa (NIC), Benki ya NBC, Benki ya NMB, Mamlaka ya Elimu ya Ufundi (VETA), Mamlaka ya Udhibiti wa Usafiri wa Ardhini (LATRA) na taasisi nyingine.