Biteko aitaka CWT kuendana na kasi ya mabadiliko duniani

Posted on: October 16th, 2025

BITEKO AITAKA CWT KUENDANA NA KASI YA MABADILIKO DUNIANI 

Naibu Waziri Mkuu na Waziri wa Nishati Mhe. Dkt. Dotto Mashaka Bitteko leo tarehe amefungua semina ya viongozi wa Chama cha Walimu Tanzania (CWT) Kanda ya Ziwa na Kanda ya Ziwa Magharibi na kukitaka CWT kubadilika kulingana na kasi mabadiliko yanayoendelea kutokea duniani.

Akizungumza katika hafla ya ufunguzi ilichofanyika katika ukumbi wa Mwembeni Complex, Mhe. Biteko amesema dunia ya leo ina kasi kubwa mnatakiwa kuwafikia walimu wakati wote wawasikilize na muwape sababu ya walimu kuwapenda ninyi na kwa kuwahudumia watarudi kwenu.

“Tumetoka mbali,------mbinu zilizotumika miaka mitano, kumi iliyopita haziwezi kuendelea kutumika katika dunia ya leo” amesema Mhe. Biteko na kuongeza kuwa “endeleeni kuishi kwa dunia inayobadilika, fikilini upya kila siku”.   

Mhe. Biteko amesema mabadiliko ya dunia yanawasukuma watu kufikiri sana tena kwa haraka na viongozi wa CWT wanapaswa kujua walimu wanaowaongoza kwa sasa sio kama walimu wa zamani kwa sababu walimu wa sasa ni watu wanaohoji sana, na sio kwamba hawaridhiki ni kwa sababu dunia iliyopo ni dunia inayobadilika.

“Mnapaswa kutambua kuwa kwa kubadilika kwa dunia na ninyi staili yenu ya uongozi lazima ibadilike ili kuweza kuwahudumia walimu vizuri” amesema mhe. Biteko.

Mhe. Biteko ametoa mifano ya mambo mbalimbali yaliyobadilika duniani ambayo wakati huo yalionekana muhimu sana, lakini kwa sasa hayahitajiki tena na kuitaka CWT kubadilisha staili yao ya uongozi ibadilike kuendana na mabadiliko ya dunia.  

Mhe. Biteko ametumia fursa hiyo kukishukuru CWT kwa mafunzo ya uongozi na fursa mbalimbali alizowahi kuzipata akiwa kiongozi wa chama hicho katika Mkoa wa Geita kabla ya kuingia katika siasa.

Aidha, Mhe. Biteko amekihakikishia CWT kuwa Serikali ya awamu ya sita inathamini kazi kubwa inayofanywa na walimu katika maendeleo ya nchi ya Tanzania na inatatua changamoto za walimu kulingana na hali ya uchumi inavyoruhusu.

Kwa upande wake, Naibu Waziri, Ofisi ya Waziri Mkuu Mhe. Patrobas Paschal Katambi, amesema Serikali ya awamu ya sita inayoongozwa na Rais wa Jamhuri ya Muungano wa Tanzania Mhe. Dkt. Samia Suluhu Hassan imeboresha masuala mengi yanayotatua changamoto za walimu hapa nchini.

Mhe. Katambi ameyataja masuala hayo kuwa ni pamoja na kufanyia marekebisho sheria mbalimbali, uboreshaji wa miundombinu ya shule, upandishwaji wa madaraja, mishahara na kulipa madeni ya watumishi ikiwemo walimu.

Mhe. Katambi amewataka walimu kuendelea kutoa huduma kwa weledi na kushirikiana na Serikali ili kuweza kutatua changamoto walizonazo ikiwa ni pamoja na kuwajengea nyumba za kuishi na kuwaboreshea mazingira ya kufanyia kazi.  

Kwa upande wake, Katibu wa CWT Mkoa wa Mara ambaye pia ni Katibu wa CWT Kanda ya Ziwa na Ziwa Magharibi Ndugu Morgson Kabeho amesema semina hiyo imehusisha viongozi wa CWT kutoka mikoa nane ya Kanda ya Ziwa na Kanda ya Ziwa Magharibi yenye wilaya 51.

Ndugu Kabeho amesema jumla ya viongozi wa CWT 450 wameshiriki mafunzo hayo na kuongeza kuwa CWT inaamini baada ya mafunzo viongozi hayo viongozi hao watakuwa na uwezo mzuri zaidi wa kuwahudumia walimu.

Semina hiyo yenye kauli mbiu “Ni Jukumu letu Walimu kushiriki Uchaguzi Mkuu 29/10/2025 kwa Maendeleo, Amani na Utulivu wa Nchi yetu” imewahusisha viongozi wa CWT kutoka Mikoa ya Mara, Mwanza, Tabora, Kagera, Kigoma, Simiyu, Geita na Shinyanga

Ufunguzi wa semina hiyo umehudhuriwa pia na Naibu Waziri, Ofisi ya Waziri Mkuu Mhe. Patrobas Paschal Katambi, Mkuu wa Mkoa wa Mara Mhe. Kanali Evans Alfred Mtambi, Katibu Tawala wa Mkoa wa Mara Ndugu Gerald Musabila Kusaya, viongozi wa CWT Taifa na Kanda ya Ziwa na Ziwa Magharibi, viongozi wa Chama cha Mapinduzi (CCM).