Wananchi Mara wahimizwa kupiga kura kwa amani na utulivu

Posted on: October 25th, 2025

Wananchi wa Mkoa wa Mara wakishirikiana na Kikundi cha Jogging Musoma leo tarehe 25 Oktoba, 2025 wamekimbia mbio za pole kwa lengo la kuhamasisha wananchi kufanya mazoezi, kupima afya zao na kushiriki uchaguzi mkuu wa mwaka 2025.

Akizungumza katika viwanja vya Hospitali ya Manispaa ya Musoma wakati wa kuhitimisha mbio hizo, Mwenyekiti wa Kikundi cha Jogging Musoma Ndugu Daudi Yunge amesema Kikundi hicho kinawashukuru wananchi wengi waliojitokeza kushiriki mbio hizo na kuwataka kuendelea kufanya mazoezi kwa ajili ya kuimarisha afya zao.

Ndugu Yunge amewapongeza wananchi kwa kujitokeza kushiriki mbio hizo ambazo zinalenga pamoja na mambo mengine kuipongeza Serikali kwa kazi nzuri iliyofanyika katika kuboresha afya za wananchi wa Mkoa wa Mara na hususan katika ujenzi wa miundombinu, upatikanaji wa vifaa tiba na dawa pamoja na ongezeko la huduma za afya.

“Mambo mengi na makubwa yamefanyika katika Mkoa wa Mara katika sekta ya afya, kwa sasa huduma za matibabu ya kibingwa na bobezi yanapatikana bila ya kutakiwa kusafiri kwenda nje ya Mkoa wa Mara” amesema Ndugu Yunge.

Aidha, Ndugu Yunge amewataka wananchi kujitokeza kwa wingi kupiga kura tarehe 29 Oktoba, 2025 ili kuwachagua viongozi watakaoyaendeleza miradi mikubwa iliyofanyika katika Mkoa wa Mara kwa kipindi kingine cha miaka mitano.  

Akizungumza wakati wa kuhitimisha shughuli hiyo, Mkuu wa Wilaya ya Musoma Mhe. Juma Chikoka ambaye amemuwakilisha Mkuu wa Mkoa wa Mara Mhe. Kanali Evans Alfred Mtambi katika tukio hilo amewataka wananchi kujitokeza kwa wingi kwa kushiriki uchaguzi kwa amani na utulivu.

Mhe. Chikoka amewahakikishia wananchi wa Mkoa wa Mara uchaguzi utafanyika kwa amani na utulivu na kuwataka wananchi kuondoa hofu kwa kuwa Serikali ya Mkoa wa Mara imejipanga kulinda amani iliyopo wakati na baada ya uchaguzi mkuu.

“Serikali ya Mkoa wa Mara imejipanga kuhakikisha uchaguzi unafanyika kwa amani na utulivu na hamna atakayeanzisha vurugu wala maandamano, tujitokeze tutimize haki yetu ya kikatiba ya kuwachagua viongozi” amesema Mhe. Chokoka.

Mhe. Chikoka amewakumbusha wananchi kuhusiana na mambo mengi ambayo yamefanywa na Rais wa Jamhuri ya Muungano wa Tanzania Dkt. Samia Suluhu Hassan kwa wakati wa uongozi wake wa miaka minne na kuwataka kuwachagua viongozi wanaoona wanaweza kuleta maendeleo kama hayo.

Aidha, Mhe. Chikoka ametumia fursa hiyo kuwahamasisha wananchi kufanya mazoezi ya viungo mara kwa mara kwa kuwa pamoja na faida zake kiafya ya binadamu, mazoezi yanaboresha mtandao wa marafiki katika jamii.

Kwa upande wake, Kaimu Katibu Tawala wa Mkoa wa Mara Dkt. Zabron Masatu amekishukuru kikundi cha Jogging Musoma kwa kuandaa mbio hizo na kuishirikisha Serikali ya Mkoa wa Mara katika tukio hilo ambalo linalenga kuimarisha afya za wananchi kwa kufanya mazoezi, kushiriki kupima afya zao na kufanya usafi.

Dkt. Masatu amesema mazoezi ni muhimu katika afya ya binadamu na hususan kwa ajili ya kuzuia na kupunguza athari za magonjwa yasiyo ya kuambukiza ambayo kwa sasa yameshamiri katika jamii kutokana na mitindo wa maisha na aina za vyakula na hivyo amekishukuru kikundi hicho kwa kuwakumbusha wananchi kwa vitendo.

Kauli mbiu ya shughuli hiyo ilikuwa Kimbia kwa Afya, Tembea kwa Amani, Jitokeze Kupiga Kura 2025 ikiwahamasisha wananchi kushiriki uchaguzi mkuu utakaofanyika hapa nchini Jumatano ijayo ya tarehe 29 Oktoba, 2025.