Nyansaho ateta na Wazee wa Mara

Posted on: December 24th, 2025

Waziri wa Ulinzi na Jeshi la Kujenga Taifa Mhe. Dkt. Rhimo Nyansaho leo tarehe 24 Disemba, 2025 amezungumza na Wazee wa Mkoa wa Mara katika eneo la Komaswa, Wilaya ya Tarime na kuwataka wazee kuwahamasisha vijana kutunza amani ya Tanzania.

Akizungumza na wazee hao kutoka Wilaya zote za Mkoa wa Mara, Mhe. Nyansaho amewataka wazee kuwaongoza vijana kuilinda nchi ya Tanzania kwa kuwahamasisha watu wote katika jamii zao kutunza amani na kuacha kutumika katika kufanya vurugu na kuharibu mali za Watanzania.

Aidha, Mhe. Nyansaho amewapongeza wazee wa Mkoa wa Mara kwa namna walivyohamasika na kushiriki uchaguzi mkuu wa mwaka 2025 kwa amani na utulivu na kuuwezesha Mkoa wa Mara kuwa katika mikoa ambayo wananchi wameshiriki kwa wingi na kuwachagua viongozi wao.  

Viongozi wengine walioshiriki katika kikao hicho ni Mkuu wa Mkoa wa Mara Mhe. Kanali Evans Alfred Mtambi, Mwenyekiti wa Jumuiya ya Wazazi a Chama cha Mapinduzi Mhe. Fadhili Magaya, Mjumbe wa Halmashauri Kuu ya CCM Mhe. Christopher Gachuma, Mkuu wa Wilaya ya Tarime Mhe. Meja Edward Gowele.

Viongozi wengine walioshiriki ni Mwenyekiti wa Wazee wa Mkoa wa Mara Chifu Masanja, Mtoto wa Baba wa Taifa Mwalimu Julius Kambarage Nyerere, Ndugu Madaraka Nyerere, viongozi wa kimila na wazee kutoka Wilaya zote za Mkoa wa Mara.

Katika kikao hicho kilichohudhuliwa na wazee zaidi ya 160, wazee wa Mkoa wa Mara wameazimia kwa kauli moja kulinda amani utulivu ya Mkoa wa Mara na Tanzania kwa ujumla na kufanya kikao kama hicho kila mwaka.