Serikali yaipongeza Mara kwa mabadiliko

Posted on: December 24th, 2025

Naibu Waziri wa Maendeleo ya Jamii, Jinsia, Wanawake na Makundi Maalum Mhe. Mhandisi Maryprisca Mahundi leo tarehe 22 Disemba, 2025 amefanya ziara katika Mkoa wa Mara na kuupongeza Mkoa wa Mara kwa mabadiliko makubwa yaliyofanikisha wanawake wanne kuchaguliwa kuwa wabunge wa majimbo katika uchaguzi Mkuu wa mwaka 2025.

Mhe. Mahundi anasema kwa historia, mila na tamaduni za wananchi wa Mkoa wa Mara zilizozoeleka isingekuwa rahisi, kuwachagua wanawake katika nafasi ya ubunge wa jimbo, jambo kubwa linalohitaji kupongezwa na wadau wote wa maendeleo.

“Ninaimani mabadiliko haya yanaweza kuwa yamechochewa na uimara aliouonyesha Mhe. Dkt. Samia Suluhu Hassan Rais wa Jamhuri ya Muungano wa Tanzania katika kuiongoza Serikali kutekeleza miradi kwa ufanisi mkubwa” amesema Mhe. Mahundi na kuongeza kuwa nafasi aliyonayo sio ya upendeleo ila imetokana na uimara wake.

Mhe. Mahundi ameupongeza uongozi wa Serikali katika Mkoa wa Mara na Chama cha Mapinduzi Mkoa wa Mara kwa kufanikisha mabadiliko hayo kuweza kutokea katika Mkoa wa Mara na kuwataka viongozi wote kuwasaidia wabunge hao kutekeleza majukumu yao kiufanisi ili kuhamasisha wanawake wengi zaidi kupewa nafasi za uongozi.

Akizungumza wakati wa mapokezi Ofisi ya Mkuu wa Mkoa wa Mara na CCM Mkoa wa Mara, Mhe. Mahundi amesema Mkoa wa Mara unakuwa mfano wa kuigwa katika mabadiliko kwa vitendo kutoka katika mazoea, mila na tamaduni zinazokwamisha maendeleo kwenda katika maendeleo endelevu katika nyanja mbalimbali.

Kwa upande wake Mkuu wa Mkoa wa Mara Mhe. Kanali Evans Alfred Mtambi amesema katika uchaguzi Mkuu wa Mwaka 2025 wananchi wa Mkoa wa Mara wameamua kwa mara ya kwanza katika historia kuwapa ubunge wa majimbo wanawake wanne kati na nafasi 10 zilizokuwa zinagombaniwa.

“Mkoa wa Mara tumeweza kufika asilimia 40/60 kwa mara ya kwanza. Hii inatokana na jitihada mbalimbali zilizofanywa na Serikali kwa kushirikiana na wadau kuwahamasisha wananchi kuchagua viongozi bora watakaowaletea maendeleo” amesema Mhe. Mtambi.

Mhe. Mtambi ametumia fursa hiyo kuwashukuru wananchi wa Mkoa wa Mara kwa kushiriki uchaguzi mkuu kwa wingi bila kufanya vurugu kutokana na kuweka maendeleo kama kipaumbele chao cha kwanza.

Wabunge wanawake waliochaguliwa katika Mkoa wa Mara ni pamoja na Mhe. Migore Miraji Mbunge wa Jimbo la Musoma Mjini; Mhe. Mary Daniel Mbunge wa Jimbo la Serengeti, Mhe. Esta Matiko Mbunge wa Jimbo la Tarime Mjini na Mhe. Esta Bulaya Mbunge wa Jimbo la Bunda. 

Hii ni mara ya kwanza kwa Mkoa wa Mara kupata nafasi nyingi za wabunge wanne wanawake kupitia majimbo ya uchaguzi.