Mtambi aomba kupandishwa hadhi kwa Chuo cha Maendeleo ya Jamii Buhare

Posted on: December 24th, 2025

Mkuu wa Mkoa wa Mara Mhe. Kanali Evans Alfred Mtambi leo tarehe 22 Disemba, 2025 amempokea na kuzungumza na Naibu Waziri wa Maendeleo ya Jamii, Jinsia, Wanawake na Makundi Maalum Mhe. Mhandisi Maryprisca Mahundi na kuongelea umuhimu wa Chuo cha Maendeleo ya Jamii Buhare kupandishwa hadhi na kuanza kutoa programu za Shahada.

Akizungumza katika mapokezi hayo, Mhe. Mtambi amesema Chuo hicho kimekuwa na programu za cheti na Diploma kwa muda mrefu na kutokana na mabadiliko yanayoendelea katika sekta mbalimbali nchini ni muhimu sana Taifa lipate wataalamu wengi wa Maendeleo ya Jamii ili kutafsiri dhana ya maendeleo kwa wananchi.

“Sasa hivi mambo mengi yanaenda kisayasi na ni muhimu sana kama wataalamu wa Maendeleo ya Jamii  kuwa na ubobevu mkubwa wa kuweza kutafsiri fursa zilizopo katika sekta mbalimbali ili ziweze kuleta tija kwa wananchi” amesema Mhe. Mtambi. 

Mhe. Mtambi amesema kwa sasa wananchi wameanza kupambana kupata maendeleo yao hivyo ni muhimu kuwa na wataalamu wengi wa Maendeleo ya Jamii ambao watawasaidia wananchi kufikia malengo ya maendeleo yaliyowekwa kitaifa na kimataifa.

Kanali Mtambi amesema Maendeleo ya Jamii inagusa maendeleo ya sekta zote za katika jamii na hivyo kuwa na wataalamu wenye elimu ya umahiri na ubobevu ni muhimu sana kwani ndio watakaoishauri  Serikali kuhusiana mwelekeo sahihi wa maendeleo ya Taifa.

Kwa upande wake, Naibu Waziri wa Maendeleo ya Jamii, Jinsia, Wanawake na Makundi Maalum Mhe. Mhandisi MaryPrisca Mahundi amesema tayari Serikali imefikiria kuhusu kukipandisha hadi Chuo hicho na mchakato wake umeanza na unaenda vizuri.

Akizungumza kwa nyakati tofauti tofauti Mhe. Mahundi amesema mchakato wa kukipandisha hadhi Chuo hicho unaendelea vizuri na kama Wizara wanaendelea kulisukuma jambo hilo ili Chuo cha Maendeleo ya Jamii Buhare kipandishwe hadhi na kuanza kutoa Shahada mbalimbali.

Kwa upande wake, Mbunge wa Jimbo la Musoma Mjini Mhe. Migore Miraji amesema Chuo hicho kwa sasa kina miaka 57 tangu kilipoanzishwa na muda wote huo kinatoa programu mbalimbali za Cheti na Diploma na kuongeza kuwa kwa sasa kinahitaji kubadilika ili kuwasaidia zaidi wananchi.

Mhe. Miraji amesema kuwa Chuo kina miundombinu ya kutosha na kama itahitajika kuongeza haitahitaji uwekezaji mkubwa sana ikilinganishwa na kuanzisha Chuo kipya na kikianza kutoa shahada kitawasaidia wanafunzi wanaotoka Mkoa wa Mara kupata elimu ya juu jirani na makazi yao.   

Kwa upande wake, Mstahiki Meya wa Manispaa ya Musoma Mhe. Alex Mtaki Nyambiti amesema Halmashauri ya Manispaa ya Musoma inatengemea kuwa Chuo hiki kikipandishwa hadhi kitaisaidia  katika kuchechemua uchumi wa wananchi wa Manispaa hiyo na kupandisha makusanyo ya Halmashauri.

“Kwa sasa mapato ya ndani ya Manispaa ya Musoma sio makubwa ikilinganishwa na mahitaji ya mikopo kutoka katika vikundi vinavyotarajiwa kunufaika na mikopo hiyo” amesema Mhe. Nyambiti na kuongeza kuwa katika kupandisha mapato Halmashauri hiyo inategemea Chuo hicho, uvuvi na biashara zilizopo katika Manispaa hiyo.

Mhe. Nyambiti amesema makusanyo ya Halmashauri yakiongezeka, itaongeza wigo wa mikopo ya wanawake, vijana na watu wenye ulemavu jambo ambalo litasaidia kupunguza tatizo la makusanyo hafifu na mikopo kidogo inayotolewa na Manispaa hiyo kwa wananchi.  

Kwa upande wake, Mkuu wa Chuo cha Maendeleo ya Jamii Buhare Ndugu Paschal Mahinyila amesema Chuo cha Maendeleo ya Jamii Buhare kimeanzisha mchakato wa kujiunga na Taasisi ya Maendeleo ya Jamii Tengeru na kwa msaada wa Wizara ya Maendeleo ya Jamii, Jinsia, Wanawake na Makundi Maalum mchakato huo unategemewa kukamilika ndani ya miezi sita ijayo.

Ndugu Mahinyila amesema kuwa mchakato huo ukikamilika, Chuo cha Maendeleo ya Jamii Buhare kitakuwa sehemu ya Taasisi ya Tengeru na kinategemea kuanza kutoa Shahada mbalimbali za Maendeleo ya Jamii kuanzia mwaka wa masomo 2026/2027 na kuboresha miundombinu ya Chuo ikiwa ni pamoja na ujenzi wa jengo la utawala, mabweni na madarasa. 

Ndugu Mahinyila amesema kwa sasa Chuo kina wanafunzi 905 na kati yao 313 ni wanaume wakati wanafunzi 592 ni wanawake na kina watumishi 26 walioajiriwa na watumishi wa kujitolewa ambao ni wakufunzi watatu.

Katika ziara hiyo, Mhe. Mahundi baada ya kupokelewa Ofisi ya Mkuu wa Mkoa wa Mara ametembelea ofisi za Chama cha Mapinduzi Mkoa wa Mara, ametembelea ofisi za wamachinga Mkoa wa Mara, kutembelea Chuo cha Maendeleo ya Jamii Buhare na baadaye kuzungumza na wajasiriamali wa Mkoa wa Mara katika ukumbi wa MCC.

 Akiwa katika Chuo cha Maendeleo ya Jamii Buhare, Mhe. Mahundi amepokea taarifa ya Chuo, amefungua mdahalo wa Maadili na Uzalendo na kuwahimiza wanachuo kuwa wazalendo na kuipenda, kuilinda na kuitetea Tanzania wakati wote.