Mtambi: Mara imejipanga kuhakikisha usalama wakati wa sikukuu

Posted on: December 24th, 2025

Mkuu wa Mkoa wa Mara Mhe. Kanali Evans Mtambi leo tarehe 24 Disemba, 2025 amezungumza na Waandishi wa Habari ambapo amewatakia heri ya sikuu wananchi wa Mkoa wa Mara na kuwahakikishia usalama wakati wote wa sherehe za Krisimasi na Mwaka Mpya, 2026.

Akizungumza na waandishi Mhe. Mtambi amesema Kamati za Usalama ya Mkoa wa Mara imejipanga vizuri na ipo tayari kuhakikisha amani na utulivu unatawala wakati wote wa sikukuu na kuwatoa hofu  wananchi kusherekea sikukuu kwa amani na utulivu.

“Kamati ya Usalama ya Mkoa wa Mara imejipanga kuhakikisha kuwa Mkoa upo salama ili wananchi washerekee sikukuu kwa amani” amesema Mhe. Mtambi.

Mhe. Mtambi amewataka watumiaji wote wa barabara kufuata sheria na taratibu za usalama barabara na madereva wa vyombo vya moto kuendesha vyombo vyao taratibu na kuacha kutumia kuendesha baada ya kutumia pombe.

Mhe. Mtambi amewataka wananchi kutumia muda huu wa mapumziko kutembelea vivutio mbalimbali vya utalii vilivyoko katika Mkoa wa Mara ikiwa ni pamoja na Hifadhi ya Taifa ya Serengeti, Makumbusho na nyumbani kwa Baba wa Taifa, Mwitongo, Butiama na fukwe za Ziwa Victoria.  

Kanali Mtambi ametumia fursa hiyo kuwashukuru wananchi kwa amani na utulivu waliouonyesha wakati mwaka mzima na kuwataka kuendelea kudumisha amani na utulivu wakati na baada ya sikukuu ili Mkoa wa Mara uwe sehemu salama kwa watu wote.

Wakati huo huo, Mhe. Mtambi amewakumbusha wananchi wa Mkoa wa Mara umuhimu wa kusherekea sikukuu huku wakikumbuka wajimbu wao katika majukumu makubwa ya kifamilia yatakayoanza mwezi Januari, 2026.

Mhe. Mtambi amesema kila familia inafahamu majukumu yake ya Januari ikiwa ni pamoja na kufanya maandalizi ya kupeleka watoto shule, shughuli za kilimo, kulipa kodi na majukumu mengine ya kifamilia na kuwataka wananchi kutumia kwa uangalifu wakati wa sikukuu.

“Haitapendeza inafika Januari watoto wanashindwa kwenda shule kwa sababu wazazi na walezi tumekula sikukuu bila kukumbuka majukumu yetu ya msingi” amesema Mhe. Mtambi.