Mtambi awasilisha maombi matatu Wizara ya Afya

Posted on: February 18th, 2026

Mkuu wa Mkoa wa Mara Mhe. Kanali Evans Alfred Mtambi leo tarehe 18 Februari, 2026 amempokea Katibu Mkuu wa Wizara ya Afya Dkt. Seif Shekalage na kuwasilisha maombi matatu kwa ajili ya kuboresha utoaji wa huduma za afya katika Mkoa wa Mara.

Mhe. Mtambi ameiomba Wizara ya Afya kufuatilia kwa karibu ukamilishaji wa Hospitali ya Kumbukumbu ya Mwalimu Nyerere inayoendelea kujengwa katika eneo la Kwangwa, Manispaa ya Musoma ili iweze kukamilika kwa haraka na kutoa huduma stahiki za kibingwa na kibobezi kwa wananchi wa Mkoa wa Mara na mikoa jirani.

Mhe. Mtambi ameiomba Wizara ya Afya kufuatilia utendajikazi wa Mshauri Mwelekezi wa Mradi huo ambaye amesema anakwamisha utekelezaji wa mradi na kusababisha fedha zilizotengwa kukamilisha mradi huo kwa mwaka wa fedha 2025/2026 kutumika kidogo kwa sababu ya kutokutekeleza majukumu yake kama inavyotakiwa.  

“Ukamilishaji wa Hospitali ya hii ulipangiwa shilingi bilioni 10 lakini mpaka wakati huu, mwaka wa fedha ukiwa unakaribia kuisha zimetumika shilingi bilioni 2.1 tu baada ya wakandarasi kuwasilisha madai yao na mshauri mwelekezi kutoyafanyia kazi” amesema Mhe. Mtambi.

Mhe. Mtambi amesema Mshauri Mwelekezi pia anasababisha wakandarasi waliopo katika mradi huo kushindwa kuendelea kukamilisha mradi wakisubiria idhini ya kuendelea kutoka kwa Mshauri Mwelekezi ili waweze kuendelea kukamilisha mradi na kutekeleza mahitaji mengine yaliyojitokeza katika  mradi huo.

Mhe. Mtambi amesema mradi huo ni moja kati ya miradi ya kimkakati ya Mkoa wa Mara na hivyo kuchelewa kukamilishwa kwa muda mrefu kunaifanya gharama ya mradi huo kuwa kubwa, wananchi kukosa huduma stahiki na kuvuruga mipango ya Serikali katika ukamilishaji wa mradi huo.

Katika hatua nyingine, Mhe. Mtambi pia ameiomba Wizara ya Afya kuridhia kuwahamisha baadhi ya madaktari wa kawaida wanaofanyakazi Hospitali ya Rufaa ya Kumbukumbu ya Mwalimu Nyerere ili wahamishiwe katika Halmashauri za Mkoa wa Mara zenye uhitaji na Madaktari Bingwa waliopo katika baadhi ya Halmashauri za Mkoa wa Mara wahamishiwe Hospitali ya Kumbukumbu ya Mwalimu Nyerere ili waweze kutumika vizuri kulingana na utaalamu wao.

Mhe. Mtambi amesema baadhi ya Halmashauri zina madaktari wachache jambo ambalo linaongeza rufaa za wagonjwa ambao wangeweza kutibiwa katika vituo vya afya na Hospitali za Halmashauri lakini kwa kuwa vbaadhi ya vituo hivi havina madaktari inawalazimu kutoa rufaa kwenda Hospitali ya Kumbukumbu ya Mwalimu Nyerere.

Aidha, Mhe. Mtambi ameiomba Wizara ya Afya kuwahamishia Madaktari Bingwa wa Upasuaji na Mifupa katika Hospitali za Halmashauri za Wilaya ya Tarime ili kutibu majeruhi wengi wanaojitokeza katika hospitali hizo kwa haraka kabla ya kupelekwa Hospitali ya Kumbukumbu ya Mwalimu Nyerere iliyopo Musoma au Hospitali ya Rufaa ya Bugando iliyopo Jijini Mwanza kwa matibabu zaidi.

Kanali Mtambi ametumia fursa hiyo kwa niaba ya wananchi wa Mkoa wa Mara kuishukuru Wizara ya Afya kwa kuratibu kambi za madaktari bingwa katika Hospitali ya Kumbukumbu ya Mwalimu Nyerere na hospitali za Halmashauri na Vituo vya Afya kuwahudumia wananchi wa Mkoa wa Mara.

Kwa upande wake, Dkt. Shekalage ameushukuru Mkoa wa Mara kwa kuchukua hatua mbalimbali katika kufuatilia ukamilishaji wa mradi wa ukamilishaji wa Hospitali ya Kumbukumbu ya Mwalimu Nyerere na kumhakikishia kuwa amekuja Mara baada ya kupokea taarifa za mradi huo na anaenda kukagua maendeleo ya utekelezaji wa mradi huo.

“Nimeambatana na wataalamu wangu tukagua utekelezaji wa mradi na kufanya kikao na wahusika wote katika mradi huo ili kupata hali halisi ya utekelezaji wa mradi kabla ya kufanya maamuzi” amesema Dkt. Shekalage.  

Aidha, Dkt. Shekalage amemtaka Katibu Tawala wa Mkoa wa Mara kufanya msawazo wa muda wa watumishi wa sekta ya afya waliopo katika Mkoa wa Mara na kuzitaarifu Wizara zinazohusika ili ziweze kuridhia katika na kufuata taratibu za kawaida za Serikali katika kuhamisha watumishi wa umma.

 Mapokezi hayo yamehudhuriwa pia na Kaimu Katibu Tawala wa Mkoa wa Mara Ndugu Dominicus Lusasi, Maafisa kutoka Wizara ya Afya, Katibu Tawala Msaidizi Sehemu ya Afya, Lishe na Ustawi wa Jamii, Meneja wa NHIF Mkoa wa Mara, Mganga Mfawidhi wa Hospitali ya Kumbukumbu ya Mwalimu Nyerere, Maafisa kutoka Ofisi ya Mkuu wa Mkoa wa Mara.