Mtambi azindua kampeni ya utoaji wa dawa kinga

Posted on: February 16th, 2026

Mkuu wa Mkoa wa Mara Mhe. Kanali Evans Alfred Mtambi leo tarehe 16 Februari, 2026 amezindua kampeni ya utoaji wa dawa kinga dhidi ya minyoo, tumbo na kichocho katika Shule ya Msingi Mazoezi, iliyopo Chuo cha Ualimu Bunda na kuwataka wananchi kuhakikisha watoto wote wenye umri wa kuanzia miaka minne wanapata dawa kinga hizo ili kujilinda dhidi ya magonjwa.

“Kama Mkoa tunachukua hatua zote kutokomeza magonjwa yasiyopewa kipaumbele na mtu yoyote anaposikia dalili za magonjwa hayo afike hospitali mapema” amesema Mhe. Mtambi.

Mhe. Mtambi ameyataja magonjwa yanayohusika na kampeni hiyo kuwa ni pamoja na matende, mabusha, usubi, kichocho na minyoo na kueleza kuwa katika Mkoa wa Mara magonjwa yanayosumbua zaidi kati ya hayo ni kichocho na minyoo.

Aidha, Mhe. Mtambi ametumia fursa hiyo kuelezea kuhusu kampeni nyingine za sekta ya afya ikiwemo utoaji wa bima ya afya kwa wote na kampeni ya kutokomeza vifo vya akina mama wajawazito wakati na baada ya kujifungua na watoto wachanga.

Akizungumzia kuhusu bima ya afya kwa wote, Mhe. Mtambi amesema Mkoa wa Mara umeshaanza kutoa kadi za matibabu kwa makundi maalum yaliyolipiwa na Serikali ikiwemo wananchi wanaotoka kaya maskini na wazee wasiojiweza.

Mhe. Mtambi amewahamasisha wananchi wote wa Mkoa wa Mara kujiunga na mpango wa bima ya afya kwa wote ili waweze kunufaika na huduma za afya na kupata uhakika wa matibabu katika hali yofauti za kiuchumi pindi matatizo yanapowafika.

Kanali Mtambi amesema Mkoa unaendelea kuboresha huduma za afya kwa kujenga vituo vipya vya kutolea huduma za afya, magari ya kubebea wagonjwa ambapo kupitia Mpango wa MMAMA Serikali imeweka utaratibu wa usafiri wa bure kwa wajawazito na watoto wachanga.

Mhe. Mtambi amewahamasisha akina mama wajawazito kuanza na kuhudhuria kliniki ili waweze kupata huduma za vipimo na ushauri wa kitaalamu kuhusiana na namna ya kuulea ujauzito kutokana na hali zao za kiafya na hatimaye kujifungulia katika vituo vya kutolea huduma za afya walivyoshauriwa.

Awali, akizungumza wakati wa Kumkaribisha Mkuu wa Mkoa, Mkuu wa Wilaya ya Bunda Mhe. Aswege Enock Kaminyonge alisema kuwa hali ya wanafunzi kuripoti shuleni katika Wilaya ya Bunda ni nzuri kwa kuwa asilimia kubwa ya wanafunzi waliotakiwa kuanza shule za awali, darasa la kwanza na kidato cha kwanza wameripoti na wanaendelea na masomo.  

Akitoa taarifa ya zoezi hilo, Katibu Tawala Msaidizi Sehemu ya Afya, Lishe na Ustawi wa Jamii Dkt. Zabron Masatu amesema zoezi hilo litakalofanyika kwa siku tatu linategemea kutoa dawa kinga kwa watoto zaidi ya laki sita wa Mkoa wa Mara wenye umri wa miaka 4 hadi 14.

Dkt. Masatu amesema zoezi hilo litahusisha zaidi wanafunzi waliopo shule na kuwashukuru walimu kwa ushirikiano wao katika kuhakikisha watoto wote wanapata dawa kinga hizo ili kuwalinda kutokana na magonjwa hayo.

Kampeni hiyo inayofanyika kwa siku tatu katika Mkoa wa Mara inaongozwa na Kauli Mbiu “Tuungane, Tuchukue hatua, Kutokomeza Magonjwa yaliyokuwa hayapewi kipaumbele”.