RC Mara ateta na Viongozi wa Dini

Posted on: January 13th, 2026

Mkuu wa Mkoa wa Mara Mhe. Kanali Evans Alfred Mtambi leo tarehe 13 Januari, 2026 amezungumza na viongozi wa Kamati ya Amani na Maridhiano na kuwaomba Viongozi wa Dini kuisaidia Serikali katika kampeni ya kutokomeza ukeketaji na kudhibiti vifo vinavyotokana na uzazi kwa wanawake wajawazito.

Akizungumza kuhusu ukeketaji, Mhe. Mtambi amesema Mkoa wa Mara kupitia Kamati ya Ushauri ya Mkoa (RCC) imeazimia kutumia njia mbalimbali na makundi mbalimbali ya watu kutoa elimu kwa wananchi ili kudhibiti masuala hayo.

“Ninyi Viongozi wa Dini mtusaidie kuwaihamasisha wananchi kupitia kwa waumini wa dini mbalimbali kuhusiana na ukeketaji na madhara yake kwa wanawake waliokeketwa” amesema Mhe. Mtambi na kuongeza kuwa wadau wote wakiungana, ukeketaji unaweza kutokomezwa katika jamii.

Mhe. Mtambi amesema Mkoa wa Mara pia kupitia RCC umeazimia kuwa katika Wilaya zenye ukeketaji, ajenda ya ukeketaji iwe ni ajenda ya kuduma katika vikao na mikutano yote inayofanyika ili kutoa elimu ya mara kwa mara kwa makundi mbalimbali.   

Akizungumza kuhusiana na vifo vya wanawake wakati wa kujifungua, Mhe. Mtambi amesema Mkoa wa Mara unapata vifo vya wanawake wakati wa kujifungua kutokana na sababu mbalimbali ikiwemo wanawake wajawazito kutokuhudhuria kliniki na kutokufuata maelekezo ya wataalamu wa afya.

Mhe. Mtambi amesema Serikali imeboresha sana upatikanaji wa huduma za afya kwa kuhakikisha wataalamu, miundombinu na vifaa tiba vipo katika vituo vya kutolea huduma za afya lakini wanawake wajawazito hawahudhulii kliniki na wachache wanaohudhuria hawatekelezi maelekezo ya wataalamu wa afya.

Mhe. Mtambi amewataka Viongozi wa Dini kuwahamasisha waumini kuhudhuria kliniki, kupima afya zao na kufuata ushauri wa wataalamu wa afya kuhusu vyakula, kutumia dawa za kuongeza damu, kuwahi hospitali wakipata uchungu na ushauri mwingine wanaopewa na wataalamu hao.

Katika kikao hicho Mhe. Mtambi pia amewapokea viongozi wa Redio Tetemo FM walioambatana na Viongozi wa Dini kwa lengo la kutambulisha Redio hiyo yenye ofisi zake katika Manispaa ya Musoma na kuomba Mkuu wa Mkoa wa Mara awe mlezi wa redio hiyo yenye leseni ya kurusha matangazo yake katika Mkoa wa Mara.

Kwa upande wake, Meneja Mkuu wa Redio Tetemo FM Ndugu Francis Mukirya amesema kuwa redio hiyo wamiliki wake ni pamoja na Askofu Mkuu wa Kanisa la New Life Gospel Community Church maarufu kama Kanisa la Bonde la Baraka, Ndugu Daniel Ouma, ameahidi kusaidia Mkoa wa Mara katika kuhamasisha jamii katika masuala mbalimbali ya kijamii ikiwemo suala la ukeketaji na vifo vya wajawazito wakati wa kujifungua.

Ndugu Mukirya amesema redio hiyo yenye kauli mbiu yake Habarika, Hamasika inamuomba Mkuu wa Mkoa awe mlezi wake pamoja na kuishauri, kuitambulisha redio hiyo kwa taasisi za Serikali na wadau na kuishirikisha katika matukio mbalimbali ya Mkoa.  

Kwa upande wake, Mwenyekiti wa Shujaa wa Maendeleo na Ustawi wa Jamii Tanzania (SIMAUJATA) Mkoa wa Mara Ndugu Joyce James aliambatana na viongozi wa dini amewaomba viongozi wa dini kuwahamasisha waumini kuhusiana na suala la malezi na makuzi ya watoto ili kujenga jamii yenye maadili mema na kumwogopa Mungu.

Ndugu Joyce amesema wazazi wengi wanatoa matunzo ya watoto lakini kwenye malezi hawatoi mifano mizuri wala elimu kuhusu watoto hao wanavyopaswa kuishi katika jamii na mara nyingi hawaendi nao katika nyumba za ibada jambo ambalo linaonyesha kuwa watoto hawapati mafundisho ya dini kama inavyotakiwa.

Mkuu wa Mkoa kukutana na viongozi wa dini ni sehemu ya utaratibu wake wa kawaida aliojiwekea wa kukutana na viongozi wa dini mara kwa mara ili kuwashirikisha katika mipango, mikakati ya Mkoa wa Mara kuhusiana na masuala mbalimbali.