Tume ya Uchunguzi ya Matukio ya wakati na baada ya uchaguzi yaingia Mara

Posted on: January 8th, 2026

Wajumbe wa Tume ya Uchunguzi wa Matukio ya Uvunjifu wa Amania yaliyotokea wakati na baada ya Uchaguzi Mkuu tarehe 29 Oktoba, 2025 leo wamewasili Mkoa wa Mara wakiongozwa na Balozi Radhia Msuya na kupokelewa na Mkuu wa Mkoa wa Mara Kanali Evans Alfred Mtambi.  

Akizungumza wakati wa mapokezi, Balozi Msuya amesema wao ni sehemu ya Tume ya Uchunguzi ya Matukio ya wakati na baada ya uchaguzi Mkuu, 2025 na siku zilizofuata ambapo ilitokea kadhia iliyopolekea watu kupoteza maisha, kuumia, mali kuteketea, kwa hiyo Mhe. Rais ameunda tume ili kuchunguza kitu gani kimetokea, madhara gani yamepatikana na nini kifanyike.  

“Tanzania hatukuwa na kawaida ya yale tuliyoyaona tarehe 29 Oktoba, 2025, tumefikaje na tutatokaje hapa” amesema Balozi Radhia na kuongeza kuwa Tume hiyo ina makamishana tisa na inaongozwa na Jaji Mkuu Mstaafu Mohammed Chande Othman na imepewa siku 90 za kufanyakazi hiyo.  

Balozi Msuya amesema kwa sasa tayari wamefanya kazi Mkoa wa Dar es Salaam na kwa sasa wapo mikoani na tayari wajumbe wamegawanyika makundi matatu wengine wameenda mikoa ya Kilimanjaro na Arusha; Mbeya na Songwe na wengine wapo katika mikoa ya Kanda ya Ziwa.

Katika Mikoa ya Kanda ya Ziwa wajumbe wa Tume walianzia Mkoa wa Mwanza kwa siku nne na baadaye kugawanyika vikundi viwili ambapo baadhi wameenda Geita na wengine wapo Mkoa wa Mara ambapo wanatarajia kufanya kazi kwa siku tatu kuanzia leo tarehe 08-10 Januari, 2026.

Balozi Msuya amepongeza maendeleo mbalimbali yaliyopatikana katika Mkoa wa Mara tangu mara ya mwisho alipotembelea na kuongeza kuwa anaamini Tanzania itasonga mbele kiuchumi na kijamii kutokana na nyenzo mbalimbali zilizopo.

Kwa upande wake, Balozi David Kapya amesema Tume hiyo itaangalia hali ilikuwaje wakati wa matukio hayo, ilidhibitiwa kwa namna gani pamoja na kusikiliza maoni, malalamiko, ushauri kutoka kwa uongozi na timu ya Mkoa na wananchi.

Akizungumza katika Mapokezi hayo, Mkuu wa Mkoa wa Mara Mhe. Kanali Evans Mtambi amewakaribisha wajumbe wa kamati hiyo na kuwahakikishia kuwa Mkoa wa Mara upo salama na wananchi wanaendelea na shughuli zao za kawaida.

Mhe. Mtambi amesema Mkoa wa Mara una matumaini makubwa na Tume ya uchunguzi katika kutoa mapendekezo yenye tija yatakayoitoa nchi sehemu ilipofikia kwa sasa hivi ili kulisaidia Taifa kudumisha amani na mshikamano wa kitaifa wakati wote. 

Baada ya kupokelewa tume hiyo itafanya mahojiano na Kamati ya Usalama ya Mkoa, maafisa mbalimbali wa Jeshi la Polisi Mkoa wa Mara na Mkoa wa Kipolisi wa Tarime Rorya na Kaimu Katibu Tawala Msaidizi Sehemu ya Afya, Lishe na Ustawi wa Jamii na wasimamizi na maafisa mbalimbali wa sekta ya afya Mkoa wa Mara.

Tarehe 09 Januari, 2026 Tume itafanya mahojiano na makundi maalum ya vijana, kutembelea magereza, mahojiano na Kamati ya Usalama ya Wilaya wakati tarehe 10 Tume itafanya mahojiano na Kamati ya Usalama ya Wilaya na mahojiano na wananchi walioathirika na makundi maalum.

Mapokezi hayo pia yalihudhuriwa na Kamati ya Usalama ya Mkoa wa Mara na Maafisa walioambatana na wajumbe wa tume hiyo na Maafisa kutoka Ofisi ya Mkuu wa Mkoa wa Mara.