Mara haitamvumilia atakayeyumbisha sekta ya elimu: Mtambi

Posted on: January 6th, 2026

Mkuu wa Mkoa wa Mara Mhe. Kanali Evans Alfred Mtambi leo tarehe 06 Januari, 2025 ameongoza kikao cha Kamati ya Ushauri ya Mkoa wa Mara (RCC) na kueleza kuwa Mkoa wa Mara haitamvumilia mtu yoyote atakayeiyumbisha sekta ya elimu.

Mhe. Mtambi amesema hayo wakati wa kujadili taarifa ya maandalizi ya mapokezi ya wanafunzi wa kidato cha kwanza katika mwaka wa masomo 2026 ambapo ameitaka Sehemu ya Elimu na Mafunzo ya Ufundi kuwasilisha kuwasilisha taarifa ya maandalizi ya mapokezi ya wanafunzi wa awali, darasa la kwanza na kidato cha kwanza kwa mwaka 2026 siku ya Ijumaa tarehe 09 Januari, 2026 saa 2 kamili asubuhi.  

“Ninataka iwasilishwe pia taarifa ya sababu za ufaulu mbovu wa wanafunzi katika Mtihani wa Taifa wa Darasa la Saba mwaka 2025 ambapo matokeo ya mtihani yanaonyesha kuwa Mkoa wa Mara ulikuwa wa mwisho na ninahitaji sababu za kitaalamu za matokeo hayo” amesema Mtambi.

Mhe. Mtambi amemuagiza Katibu Tawala wa Mkoa wa Mara kuhakikisha kuwa taarifa hiyo itakapowasilishwa Wakuu wa Sehemu na Vitengo vya Sekretarieti ya Mkoa wa Mara wawepo na kuwataka wasimamizi wote wa sekta ya elimu wakiwemo Maafisa Elimu Kata, Wakaguzi wa Shule na Wadhibiti Ubora kutekeleza majukumu yao kwa ufanisi.

“Ninataka kila mtu atomize wajibu wake na wajitahidi kutatua changamoto katika maeneo yao, kama walimu hawatoshi wao wanaweza kuingia madarasani na kufundisha kwa sababu wao ni walimu na kazi ya kusimamia hawaifanyi wakati wote” amesema Mhe. Mtambi.

Kanali Mtambi amesema kwa historia Mkoa wa Mara umekuwa ukifanya vizuri katika elimu na kukumbushia Azimio la Musoma la Mwaka 1974 ambalo lilisistiza umuhimu wa elimu kwa maendeleo endelevu ya Taifa ambalo liliasisiwa na Baba wa Taifa Mwalimu Julius Kambarage Nyerere na likaleta matokeo chanya katika maendeleo ya elimu hapa nchini.

Mhe. Mtambi amesistiza msimamo wa Mkoa wa Mara kuhakikisha wanafunzi wote wanapatiwa chakula shuleni na kuwataka Wakuu wa Wilaya, wasimamizi wa sekta ya elimu na viongozi wote wa Mkoa Mara kuhakikisha shule zote zinatoa chakula shuleni na wanafunzi wote wanaotakiwa kuanza shule wanaenda shule zitakapofunguliwa.

“Kama wanafunzi hawapelekwi shule, viongozi tuchukue hatua, watoto wasome, kuna sheria za nchi a sheria ndogondogo tuzitumie kuhakikisha watoto wote wanaotakiwa kuanza shule wanaanza” amesema Mhe. Mtambi.

Kanali Mtambi amewataka wazazi na walezi wa wanafunzi kutimiza wajibu wao kwa mujibu wa sheria na taratibu za nchi na hususan kuwapeleka watoto shule, kuhakikisha wanapata angalau mlo mmoja wakiwa shule na wanaishi katika mazingira salama nyumbani na katika jamii.

Mhe. Mtambi amesema elimu ni suala muhimu sana katika ustawi na maendeleo ya jamii na haliwezi kuachiwa likafanyika kiholela bila kusimamiwa kwa ukaribu na kutoa onyo kwa watumishi wote wa sekta ya elimu kujitathmini na kukemea uzembe na kutokuwajibika katika kutekeleza majukumu yao.

Taarifa nyingine zilizopokelewa na kujadiliwa katika kikao cha RCC ni pamoja na taarifa ya mwenendo wa uzalishaji mali katika Mkoa wa Mara; taarifa ya utekelezaji wa Mpangokazi wa Taifa wa Kutokomeza Ukatili Dhidi ya Wanawake na Watoto Awamu ya Pili; taarifa ya maendeleo ya sekta ya Viwanda, Biashara na Uwekezaji Mkoa wa Mara.

Taarifa nyingine zilizopokelewa na kujadiliwa katika kikao hicho ni taarifa ya upatikanaji wa maji Mkoa wa Mara; na taarifa ya upatikanaji wa umeme katika Mkoa wa Mara.

Kikao hicho kimehudhuriwa na Wakuu wa Wilaya za Mkoa wa Mara, Kamati ya Usalama ya Mkoa, wabunge, Meya, Wenyeviti na wakurugenzi wa Halmashauri za Mkoa wa Mara, Menejimenti ya Sekretarieti ya Mkoa, maafisa kutoka taasisi za umma, viongozi wa dini, viongozi wa vyama vya siasa, wadau wa maendeleo na wawakilishi wa vyama mbalimbali vya kiraia.