Mtambi: Jitokezeni kupiga kura

Posted on: October 29th, 2025

Mkuu wa Mkoa wa Mara Mhe. Kanali Evans Alfred Mtambi leo tarehe 29 Oktoba, 2025 amepiga kura katika kituo cha ofisi ya Kata ya Mukendo, Manispaa ya Musoma na kuwataka wananchi kujitokeza kwa wingi kupiga kura.

Akizungumza mara baada ya kupiga kura, Mhe. Mtambi amewahakikishia wananchi Mkoa wa Mara upo salama na zoezi la kupiga kura limeanza kuanzia saa moja asubuhi kwa amani na utulivu na litafungwa saa 10 jioni.

Mhe. Mtambi amewasihi wananchi baada ya kupiga kura kurudi nyumbani kusubiria matokeo na kuepuka mikusanyiko isiyo ya lazima.

Kwa upande wake, Mkuu wa Wilaya ya Musoma Mhe. Juma Chikoka amesema wananchi wa Manispaa ya Musoma wamejitokeza kwa wingi kupiga kura na hali ya usalama katika Wilaya ya Musoma ni salama hamna matukio yoyote ya uvunjifu wa amani.

Mhe. Chikoka amewataka wananchi kushiriki kupiga kura ili kuwachagua viongozi.

Jumla ya wananchi 1,379,763 wanapiga kura katika Mkoa wa Mara kupitia majimbo 10 ya uchaguzi na vituo vya kupiga kura 3,712.

Kwa mujibu wa taarifa ya Tume Huru ya Taifa ya Uchaguzi jumla ya Watanzania 37,647,235 wanatarajiwa kupiga kura kesho tarehe 29 Oktoba, 2025 katika uchaguzi mkuu wa mwaka 2025 ambapo watapata fursa ya kuwachagua viongozi mbalimbali kuanzia Rais, wabunge na madiwani watakaoiongoza Tanzania kwa kipindi cha miaka mitano ijayo.