RC Mtambi kuwaongoza watumishi mazishi ya Saaban Ndalu

Posted on: January 30th, 2026

Mkuu wa Mkoa wa Mara Mhe. Kanali Evans Alfred Mtambi anatarajiwa kuwaongoza watumishi wa Sekretarieti ya Mkoa wa Mara katika mazishi ya Mhasibu Mkuu Daraja la 1 CPA. Shaaban Chissebe Ndalu aliyefariki leo tarehe 30 Januari, 2026 katika Hospitali ya Benjamin Mkapa, Dodoma anayetarajiwa kuzikwa Jumatatu tarehe 02 Februari, 2026 nyumbani kwake katika eneo la Mpuguzi, Dodoma.

Akizungumza baada ya kupokea taarifa za msiba huo, Mhe. Mtambi ametoa pole kwa familia, ndugu, jamaa na marafiki wa marehemu kwa msiba huo na amesema kuwa pengo aliloliacha halitaweza kuzibika kiurahisi na marehemu atakumbukwa kwa uhodari na uchapakazi wake.  

Katika safari hiyo, Mhe. Mtambi ataambatana na Katibu Tawala wa Mkoa wa Mara Ndugu Gerald Musabila Kusaya na maafisa wengine wa Sekretarieti ya Mkoa wa Mara ili kushiriki mazishi hayo.

Marehemu Ndalu alizaliwa tarehe 11 Julai, 1975 Chibelela, katika Wilaya ya Bahi, Mkoa wa Dodoma na alihitimu darasa la saba Shule ya Msingi Chibelela mwaka 1990 na akafaulu kwenda Shule ya Sekondari ya Azania, Dar es Salaam ambapo alihitimu mwaka 1994 na alichaguliwa kwenda Kidato cha Tano na Sita katika Shule ya Sekondari ya Mazengo, Dodoma ambapo alihitimu mwaka 1997.

Ndugu Ndalu alihitimu Diploma ya Juu ya Uhasibu kutoka Chuo cha Usimamizi wa Fedha (IFM) mwaka 2004, Diploma ya Uzamili katika Uhasibu kutoka Chuo cha Uhasibu Arusha mwaka 2006 na baadaye alipata Cheti cha Uhasibu wa Umma (CPA) mwaka 2017.

Ndugu Ndalu aliajiriwa na Halmashauri ya Wilaya ya Mpwapwa mwaka 2005 kama Mhasibu wa miradi na baadae akapandishwa vyeo hadi Disemba, 2027 alipoteuliwa kuwa Kaimu Mkuu wa Idara ya Fedha na Biashara hadi mwaka 2018 alipohamishiwa Halmashauri ya Wilaya ya Bunda kama Kaimu Mkuu wa Idara ya Fedha na Biashara.

Mwaka 2020 Ndalu alithibitishwa kama Mkuu wa Idara ya Fedha na Biashara katika Halmashauri ya Wilaya ya Bunda na alifanya kazi hadi Julai, 2022 alipohamishiwa Ofisi ya Mkuu wa Mkoa wa Mara kama Mhasibu Mkuu Daraja la 1 hadi leo tarehe 30 Januari, 2026 alipofariki.   

Marehemu Ndalu amefariki baada ya kuugua kwa muda mfupi na kulazwa Hospitali ya Benjamin Mkapa, Dodoma wakati akiwa katika likizo yake ya mwaka na baada ya matibabu alipata nafuu na kutolewa hospitali hata hivyo hali yake ilibadilika tarehe 28 Januari, 2026 ambapo alirudishwa hospitali na akalazwa hadi mauti yalipomkuta.

Marehemu Ndalu ameacha mke na watoto watatu.

Bwana ametoa, Bwana ametwaa, jina la Bwana lihimidiwe!