Mtambi awataka wakandarasi Mara kutekeleza miradi usiku na mchana

Posted on: November 8th, 2025

Mkuu wa Mkoa wa Mara Mhe. Kanali Evans Alfred Mtambi leo tarehe 08 Novemba, 2025 amekagua barabara ya Makutano- Nyamuswa- Ikoma Gate sehemu ya Sanzate – Natta na kurudia maelekezo yake ya kuwataka wakandarasi wanaotekeleza miradi ya maendeleo katika Mkoa wa Mara kufanyakazi usiku na mchana.  

Akizungumza wakati wa ukaguzi wa barabara hiyo, Mhe. Mtambi amewataka wakandarasi na wazabuni wanaotekeleza miradi mbalimbali katika Mkoa wa Mara kufanyakazi kwa bidi ili kukamilisha kwa haraka miradi ya huduma za jamii kama vile hospitali, shule, barabara na kadhalika.

“Shughuli za ukaguzi wa miradi kwa sasa ndio zimeanza, niwaombe wakandarasi na wazabuni mliopewa kazi ndani ya Mkoa wa Mara kuhakikisha mnafanyakazi usiku na mchana ili kukamilisha miradi mliyopewa kwa wakati ili kuwawezesha wananchi kupata huduma stahiki” amesema Mhe. Mtambi.

Kanali Mtambi amesema Serikali ya Awamu ya Sita inaendelea kuweka jitihada thabiti ili kuhakikisha Mkoa wa Mara unatekeleza miradi ya kimkakati ambayo itakuwa chachu ya kurahisisha shughuli mbalimbali za uchumi na kijamii kwa wananchi na kuwataka wakandarasi kutimiza majukumu yao ili malengo ya Serikali yaweze kutimia.

Mhe. Mtambi ametoa rai kwa vyombo vya usalama katika Mkoa wa Mara kusimamia kwa weredi ulinzi wa miradi ya maendeleo inayotekelelezwa pamoja na kuwahamasisha wananchi kudumisha amani na utulivu katika maeneo yao.

Wakati huo huo, Mkuu wa Mkoa amewataka wananchi wa Mkoa wa Mara kutowalinda na kuwahifadhi wahalifu na wanaochochea vurugu hapa nchini na kuwaasa kuwa kwa kufanya hivyo wanakuwa ni sehemu ya wanaoharibu amani na utulivu katika jamii.

“Ukimuona mtu ambaye anafanya vitendo vya kuharibu miundombinu ya Serikali, taasisi au watu binafsi mwakemee na ikishindikana mtoe taarifa kwa Jeshi la Polisi ili hatua stahiki ziweze kuchukuliwa na msikubali kuwalinda na kuwahifadhi wahalifu” amesema Mhe. Mtambi.

Mhe. Mtambi amewahakikishia wananchi kuwa Mkoa wa Mara upo salama na kuwataka watumishi, wananchi, wanafunzi kuendelea kutekeleza majukumu yao ya kujiletea maendeleo wakati vyombo vya usalama vikiendelea kulinda amani na usalama.   

Aidha, Mhe. Mtambi amewataka wananchi kuitunza miradi inayotekelezwa katika maeneo yao kwa kuwa wao ni wanufaika wa miradi hiyo pamoja na kufanyakazi kwa bidii, kuacha kukochea au kujihusisha na vitendo vya uvunjifu wa amani ikiwemo uharibifu wa miundombinu.

Akizungumzia kuhusu mradi huo, Mhe. Mtambi ameitaka TANROADS kufanya ukaguzi wa mara kwa mara wa mradi huo ili kuhakikisha unatekelezwa kwa viwango vya ubora na kwa wakati na hakikisha barabara hiyo inakamilika katika muda uliopangwa.

Kwa upande wake, Mkuu wa Wilaya ya Serengeti Mhe. Angelina Marco amesema Wilaya ya Serengeti ipo salama na wananchi wanaendelea na shughuli zao ikiwemo wanafunzi kuendelea na masomo yao kama kawaida.

“Kwa sasa Wilaya ya Serengeti ipo salama na wananchi wanaendelea na shughuli zao za kawaida” amesema Mhe. Marco.

Mhe. Marco amemshukuru Mkuu wa Mkoa kwa kutembelea na kuukagua mradi huo ambao amesema umekwama kwa muda mrefu na wananchi wanahamu ya kuuona unakamilika na barabara hiyo ikitumika.   

Kwa upande wake, Meneja wa Wakala wa Barabara (TANROADS) Mkoa wa Mara Mhandisi Vedastus Maribe amesema barabara ya Sanzate –Natta ni sehemu ya Barabara ya kutoka Musoma kuelekea Arusha kupitia Hifadhi ya Taifa ya Serengeti, Ngorongoro na Mto wa Mbu.  

Mhandisi Maribe amesema mradi huo unatekelezwa na China Railway Seventh Group Co. LTD (CRSG) kutoka nchini China na mkataba wa ujenzi wa mradi huo ulitiwa saini tarehe 02 Aprili, 2020 na ulitakiwa kutekelezwa kwa muda wa miezi 24 kwa gharama ya shilingi milioni bilioni 52.7.

“Kwa sasa Mkandarasi anaendelea kuteleza mradi huu hadi tarehe 20 Januari, 2026 na tayari ameshaomba kuongezewa muda wa mwaka mmoja ili aweze kukamilisha mkataba huu” amesema Mhandisi Maribe.  

Mhandisi Maribe amesema kuwa mradi upo katika asilimia 56 ya utekelezaji wake na tayari mkandarasi ameshalipwa zaidi ya shilingi bilioni 10.4 na bado mkandarasi anadai shilingi bilioni 3.7 na kufafanua kuwa changamoto kubwa katika utekelezaji wa mradi huo ni kuchelewa kwa malipo ya mkandarasi wa mradi huo.

Katika ziara hiyo, Mkuu wa Mkoa ameambatana na Kamati ya Usalam ya Mkoa na Wilaya ya Serengeti, viongozi na watendaji wa Halmashauri ya Wilaya ya Serengeti, maafisa kutoka TANROADS na wakandarasi wa mradi huo.