Kusaya: wataalamu wa kilimo fanikisheni Mpango wa Mageuzi ya Kilimo 2050

Posted on: October 24th, 2025

Katibu Tawala wa Mkoa wa Mara Ndugu Gerald Musabila Kusaya leo amefungua warsha ya kuwajengea uwezo wataalam kutoka Ofisi ya Mkuu wa Mkoa wa Mara na Halmashauri za Mkoa wa Mara na kuwataka wataalamu wa kilimo kutekeleza kwa ufanisi mpango wa mageuzi ya kilimo 2050.

Akizungumza katika ufunguzi wa warsha hiyo, Ndugu Kusaya amewataka wataalamu hao kuondoa dhana iliyojengeka katika jamii kuwa kilimo ni adhabu kwa kuwaonyesha fursa mbalimbali zinazoletwa na mpango huu wa mageuzi ya kilimo hapa nchini ili waweze kuzichangamkia na kuinua hali yao ya uchumi.

“Mnao wajibu wa kukiondoa kilimo katika hali ya sasa na kukifanya kuwa miungoni mwa sekta muhimu hapa nchini ambayo ikitumika vizuri itamkomboa mkulima kuondokana na umaskini na kukuza uchumi wa familia hadi Taifa” amesema Ndugu Kusaya.

Kusaya amebainisha kuwa wataalamu wa sekta ya kilimo wakitimiza wajibu wao katika kusimamia kilimo na kuziunganisha sekta za uvuvi, ufugaji na kilimo ili kuongeza tija na kuimarisha uchumi jumuishi katika jamii.

Ndugu Kusaya amewataka wataalamu wa kilimo kusimamia mabadiliko katika sekta ya kilimo ili yaonekane na kuachana na kilimo cha mazoea kinachofanywa na wakulima na kuchukuliwa kama ni kazi ya watu maskini katika jamii, wakati kilimo kikifanyika vizuri kinauwezo wa kuzalisha matajiri wengi sana kiurahisi.

Ndugu Kusaya amesema mpango huo unalenga kuinua hali ya uchumi ya wakulima wa kawaida na hususan waliopo katika maeneo ya vijijini ambao wanaweza kuachana na kilimo cha kujikimu na kufanya kilimo cha biashara na kuuza mazao yao katika soko la dunia.

Kwa upande wake, Mkurugenzi kutoka Ofisi ya Mageuzi ya Kilimo (OTA) Ndugu Elizabeth Misokia amesema Serikali imeanzisha mpango wa mageuzi ya kilimo 2050 kutokana na umuhimu wa sekta ya kilimo katika kufanikisha malengo ya dira ya Taifa ya 2025/2050.

Ndugu Misokia amesema utekelezaji wa mpango huo utasaidia kuleta mageuzi ya kilimo na kuifanya kuwa sekta yenye tija kwa wakulima na mchango mkubwa kwa ukuaji wa pato la mtu mmoja mmoja na pato la Taifa kwa ujumla.

Amesema mpango huo unahusisha kilimo cha mazao 20 ambayo yatatumika kwa ajili ya kuleta mageuzi ya kilimo na usalama wa chakula na kilimo biashara kwa ajili ya masoko ya ndani na nje ya nchi.

Ndugu Misokia ameyataja mazao yaliyopewa kipaumbele katika mpango huu ni pamoja na mazao ya bustani, ngano, pamba, matunda, maziwa, kunde, korosho, kahawa, viungo, ufugaji wa samaki, malisho ya mifugo, kuku, alizeti, katani, mpunga, mahindi, nyama na soya.

Warsha hiyo imehudhuriwa na wataalamu wa kilimo kutoka Ofisi ya Mkuu wa Mkoa wa Mara, Halmashauri zote tisa za Mkoa wa Mara na maafisa kutoka OTA.