Hapi azindua Kampeni ya Usafi Mara

Posted on: September 4th, 2021

Mkuu wa Mkoa wa Mara Mheshimiwa Ally Salum Hapi le tarehe 4 Septemba 2021 amezindua Kampeni ya Usafi wa Mazingira kwa Mkoa wa Mara kwa kufanya usafi katika Soko Kuu la Musoma na baadaye kushiriki kufanya usafi katika Soko la Saanane.

Akizungumza na wananchi na wafanyabiashara wa Soko la Saanane Mheshimiwa Hapi amewashukuru wananchi waliojitokeza kufanya usafi katika eneo hilo.

“Ninawashukuru sana kwa kuja na kushiriki katika kufanyausafi kwa wingi namna hii, zoezi hili litakuwa ni zoezi endelevu hivyo tuendelee kuyasafisha mazingira tunayoyatumia” alisema Mheshimiwa Hapi.

Aidha amewataka viongozi wa mitaa, kata na vijiji kuendelea kuwasimamia wananchi katika kufanya usafi wakati wote katika maeneo yao ili kuweza kupunguza magonjwa yanayotokana na usafi.

Mkuu wa Mkoa amewaagiza wafanyabiashara kuendelea kufanya usafi katika maeneo yanayozunguka biashara zao ili kufanyabiashara katika maeneo masafi kwa aili ya kulinda afya zao na afya za wateja wao.

Mheshimiwa Hapi ameahidi kuwaletea seti moja ya televisheni ili wafanyabiashara hao waweze kuangalia taarifa za habari wakati wanaendelea na biashara zao.

Amewahimiza wazazi kuwafundisha watoto usafi ili wajifunze wakiwa bado wadogo thamani ya usafi katika maisha yao na jamii nzima.

Mheshimiwa Hapi amesema hivi karibuni Mkoa utazindua kampeni ya kupanda miti katika maeneo mbalimbali na wananchi watagawiwa miche ya kupanda katika maeneo ya nyumba zao.     

Akizungumza wakati wa kumkaribisha Mkuu wa Mkoa, Mkuu wa Wilaya ya Musoma Dkt. Alfany Haule ameeleza kuwa katika Wilaya ya Musoma usafi umefanyika katika kata zote za Wilaya ya Musoma na mwitikio wa wananchi umekuwa mkubwa sehemu zote.

“Tumejipanga kuhakikisha wilaya yetu inaondokana na magonjwa yanayotokana na uchafu ambayo yanawaathiri wananchi wetu kwa kusimamia usafi wa mazingira yanayotuzunguka” alisema Mheshimiwa Haule.

Ameeleza kuwa japokuwa kampeni ya usafi imezinduliwa katika Wilaya ya Musoma, zoezi la usafi limefanyika leo katika wilaya zote za Mkoa wa Mara.

Amewashukuru sana wananchi kwa kujitokeza kwa wingi ili kufanikisha uzinduzi wa kampeni ya usafi.