RC Mtambi apewa Tuzo ya Amani

Posted on: December 23rd, 2025

Jumuiya ya Amani na Maridhiano Tanzania imetoa tuzo ya kulinda amani na usalama kwa Mkuu wa Mkoa wa Mara Mhe. Kanali Evans Alfred Mtambi kwa kutambua mchango wake katika kulinda na kudumisha amani hapa nchini.

Akizungumza wakati wa kukabidhi tuzo hiyo, Mkurugenzi wa Idara ya Usimamizi, Uwajibikaji na Mahusiano wa Jumuiya ya Amani na Maridhiano Tanzania Ndugu Leira Riyaz Bhanji amesema Jumuiya hiyo inampongeza Mhe. Mtambi kwa ushirikiano anaoutoa kwenye jumuiya hiyo katika kulinda amani.

“Tunatoa tuzo hizi na kuwazawadia kwa viongozi kama sehemu ya kuwatia moyo na hususan wale wanaojitahidi kudumisha amani” amesema Ndugu Bhanji na kuwataka viongozi wa dini kuwa mstari wa mbele katika kulinda amani ya nchi ya Tanzania.

Viongozi wengine waliopewa tuzo na Jumuiya hiyo ni Kamanda wa Polisi wa Mkoa wa Mara, Meneja wa Mamlaka ya Mapato (TRA) Mkoa wa Mara ikiwa ni kutambua mchango wao katika kulinda amani, usalama na mshikamano wa jamii.

Kwa upande wake, Katibu wa Jumuiya ya Amani na Maridhiano Mkoa wa Mara Shere Juma Meko amesema tuzo hizo zina maana kubwa kwa kuwa zinawahamasisha viongozi kuendelea kusimamia na kulinda amani hapa nchini.

Shehe Meko amesema kuwa Jumuiya hiyo ipo tayari kushirikiana na viongozi wanaosaidia katika kulinda amani huku wakiendelea kuliombea Taifa.

Akizungumza baada ya kupokea tuzo hiyo Mhe. Mtambi ameishukuru Jumuiya ya Amani na Maridhiano Tanzania amesema kuwa tuzo hiyo ni kielelezo cha kazi nzuri iliyofanywa na Kamati ya Maridhiano ya Mkoa wa Mara kwa kushirikiana na wadau mbalimbali katika kuhakikisha amani inadumu wakati wote.

“Hii tuzo ni wananchi na viongozi wote wa Mkoa wa Mara kwa kutambua ustahimilivu na ukomavu wao wa kustahimili mihemko ya kisiasa na uvunjifu wa amani” amesema Mhe. Mtambi na kuwataka wananchi kuendelea kudumisha amani na utulivu.

 Mhe. Mtambi pia amewapongeza Waandishi wa Habari wa Mkoa wa Mara kwa kuwa mstari wa mbele kuhamasisha amani na utulivu kwa kuendelea kutoa habari zenye maudhui chanya na kuchochea utulivu katika jamii.