RC awapokea Maafisa na wanafunzi kutoka Chuo cha Jeshi cha CSC

Posted on: October 13th, 2025

Mkuu wa Mkoa wa Mara Mhe. Kanali Evance Alfred Mtambi leo tarehe 13 Oktoba, 2025 amewapokea wakufunzi, Maafisa na wanafunzi 48 kutoka Chuo cha Ukamanda na Unadhimu (CSC) kilichopo Duluti, Mkoani Arusha waliopo katika Mkoa wa Mara kwa ajili ya mafunzo kwa vitendo.

Akizungumza katika mapokezi hayo, Mhe. Mtambi amewakaribisha Maafisa na Wanafunzi hao katika Mkoa wa Mara na kuwahakikishia kuwa Mara ipo salama na wananchi wake wanaendelea kufanya shughuli zao za kila siku.

“Kwa niaba ya wananchi na viongozi wa Mkoa wa Mara ninawakaribisha Maafisa na wanafunzi wote wa Chuo hiki katika Mkoa wa Mara na ninawaomba kuangalia uwezekano wa kutembelea eneo la Fort Ikoma ambapo mafunzo ya kijeshi yalipoanzia katika historia ya Jeshi la Wananchi wa Tanzania (JWTZ).   

Mhe. Mtambi amewataka viongozi, watedaji na wananchi wa Mkoa wa Mara kuwapa ushirikiano Maafisa na Waafunzi hao kwa muda wote watakaokuwepo katika Mkoa wa Mara na kuwataka viongozi wa msafara huo kutoka taarifa kama watapata changamaoto yoyote katika mafunzo yao.  

Mhe. Mtambi amesema Mkoa wa Mara umechaguliwa kufanyiwa mafunzo hayo kutokana na kuwa ni rasilimali za kiuchumi ikiwemo Ziwa Victoria, mito, madini, maeneo ya kilimo, ufugaji na maeneo ya kihistoria ya nchi ya Tanzania.

Aidha, Kanali Mtambi amesema Mkoa wa Mara upo katika eneo la kimkakati na unapakana na nchi za Kenya na Uganda na hivyo kuwa sehemu muhimu ya biashara za mpakani na biashara za ndani ya nchi kutokana na eneo lake.

Mhe. Mtambi amewataka maafisa na wanafunzi hao kuwa mabalozi wa Mkoa wa Mara na kuwataka kusaidia kuyatangaza mambo mazuri ya Mkoa wa Mara popote watakapoenda baada ya mafunzo hayo.

Kwa upande wake, Afisa Mkuu wa Mafunzo wa CSC Kamali Verious C. Mbuzi amesema wapo katika Mkoa wa Mara kwa mafunzo kwa vitendo ya wiki moja kujifunza kuhusiana na miundo msingi ya kiuchumi na usalama wa nchi kuanzia leo tarehe 13 Oktoba, 2025 hadi tarehe 18 Oktoba, 2025.

Kanali Mbuzi amesema katika mafunzo kwa vitendo maafisa na wanafunzi wa chuo hicho  wamegawanyika katika makundi matatu na wanafanya mafunzo kwa vitendo katika mikoa ya Mara, Iringa na Kigoma.

Kanali Mbuzi amesema Chuo hicho kinatoa kozi za Shahada ya Umahiri na Diploma na wanafunzi wanaoandaliwa kubeba majukumu makubwa na wanatokea katika nchi za Burundi, Rwanda, Uganda, Afrika Kusini, Zimbabwe, Malawi, Zambia, Namibia na wenyeji Tanzania wakati wakufunzi waliomo katika msafara huo wanatoka katika mataifa ya India, Zimbabwe, Zambia na Tanzania na amekabidhi zawadi mbalimbali kutoka katika Chuo hicho kwa Mkuu wa Mkoa wa Mara. 

Ameyataja maeneo yatakayotembelewa katika ziara hiyo kuwa ni pamoja na Manispaa ya Musoma, Mgodi wa Dhahabu wa North Mara, shughuli za Kilimo, Ufugaji wa samaki kwenye vizimba, Chuo Kikuu cha Mwalimu Julius Kambarage Nyerere Butiama na Makumbusho ya Mwalimu Nyerere Butiama.

Hafla ya mapokezi hayo imehudhuriwa na Katibu Tawala wa Mkoa wa Mara Ndugu Gerald Musabila Kusaya, Mkuu wa Wilaya ya Musoma Mhe. Juma Chikoka, wajumbe wa Kamati ya Usalama ya Mkoa, wajumbe wa Menejimenti ya Sekretarieti ya Mkoa.

Baada ya mapokezi hayo, Maafisa na Wanafunzi hao wamekutana na viongozi na maafisa kutoka Manispaa ya Musoma katika Ukumbi wa Uwekezaji, Ofisi ya Mkuu wa Mkoa wa Mara kabla ya kuendelea na ziara yao.