Nyansaho ahaidi kufuatilia utekelezaji wa miradi ya kimkakati

Posted on: December 24th, 2025

Waziri wa Ulinzi na Jeshi la Kujenga Taifa Mhe. Dkt. Rhimo Nyansaho leo tarehe 21 Disemba, 2025 ametembelea ofisi ya Mkuu wa Mkoa wa Mara na kuahidi kushirikiana na wabunge na viongozi wengine wa Mkoa wa Mara kufuatilia utekelezaji wa miradi ya kimkakati na miradi iliyopo katika ilani ya uchaguzi ya Chama cha Mapinduzi (CCM) ya mwaka 2025-2030.

Mhe. Nyansaho ametoa ahadi hiyo wakati akizungumza na viongozi na watendaji wa Mkoa wa Mara walioshiriki mapokezi hayo kufuatia maombi yaliyotolewa kwa nyakati tofauti na Mkuu wa Mkoa wa Mara na Mwenyekiti wa Chama cha Mapinduzi Mkoa wa Mara na kuwawahakikishia wananchi kuwa miradi yote iliyomo kwenye ilani ya CCM itatekelezwa mapema iwezekanavyo.

“Sisi tutajitahidi kuhakikisha kuwa miundombinu ya kimkakati ya Mkoa wa Mara inapata fedha za utekelezaji na miradi inakamilika kwa wakati” amesema Mhe. Nyansaho na kuongeza kuwa anafuatilia kwa karibu miradi ya barabara za ndani ya Mkoa na ujenzi wa Uwanja wa Ndege wa Kimataifa wa Serengeti.

Aidha, Mhe. Dkt. Nyansaho ametembelea ofisi za Chama cha Mapinduzi (CCM) Mkoa wa Mara na kuzungumza na Halmashauri Kuu ya CCM Mkoa wa Mara wakiongozwa na Mwenyekiti wa CCM Mkoa wa Mara Mhe. Patrick Chandi Marwa.

Akizungumza wakati wa kumkaribisha Mhe. Nyansaho, Mhe. Chandi amesema Mkoa wa Mara upo salama na haukuathirika sana na vurugu wakati wa uchaguzi mkuu wa mwaka 2025 kutokana na jitihada zilizochukuliwa na Kamati ya Usalama ya Mkoa wa Mara.

Mhe. Chandi amewashukuru wananchi wa Mkoa wa Mara kwa kushiriki uchaguzi na kuwachagua viongozi wa Chama cha Mapinduzi katika nafasi za Urais na Ubunge na kuufanya Mkoa wa Mara kuwa kati ya mikoa 10 ya Tanzania iliyofanya vizuri katika uchaguzi huo.  

Akizungumza katika mapokezi hayo, Mkuu wa Mkoa wa Mara Mhe. Kanali Evans Alfred Mtambi amemuomba Mhe. Waziri kusaidia kufanikisha utekelezaji wa miradi ya barabara ya Musoma-Arusha, barabara za ndani ya Mkoa, upanuzi na ukarabati wa Uwanja wa Ndege Musoma na Ujenzi wa Uwanja wa Ndege wa Kimataifa wa Serengeti miradi ambayo amesema itaimarisha huduma na uchumi wa Mkoa wa Mara na Taifa kwa ujumla.

Mhe. Mtambi amesema Mkoa upo salama na amewashukuru wananchi wa Mkoa wa Mara kwa namna ambavyo wameulinda Mkoa wao na watu wake kwa amani na utulivu katika mwaka 2025 na kuwataka kuendelea kufanya hivyo kwa mwaka 2026.

 Mapokezi hayo yalihudhuriwa na viongozi wa Chama cha Mapinduzi Mkoa wa Mara, Kamati ya Usalama ya Mkoa, Mkuu wa Wilaya ya Musoma, Menejimenti ya Ofisi ya Mkuu wa Mkoa wa Mara, viongozi wa Halmashauri ya Manispaa ya Musoma, viongozi wa dini.