Mtambi aipongeza Nyansaho Foundation kuchangilia bilioni 40 katika maendeleo ya Mara

Posted on: October 1st, 2025

Mkuu wa Mkoa wa Mara Mhe. Kanali Evans Alfred Mtambi leo tarehe 30 Septemba, 2025 ameipongeza Nyansaho Foundation kwa kutoa zaidi ya shilingi bilioni 4 kwa ajili ya miradi mbalimbali ya maendeleo katika Mkoa wa Mara tangu taasisi hiyo ilipoanzishwa.

Mhe. Mtambi ametoa pongezi hizo katika hafla ya kukabidhi mabasi ya wananfunzi yenye thamani ya shilingi 372 yaliyotolewa na Nyansaho Foundation kwa Shule za Sekondari za Natta, Machochwe na Ngoreme zilizopo katika Wilaya ya Serengeti.

“Mchango mlioutoa umeleta mabadiliko makubwa katika maisha ya watu wa Wilaya ya Serengeti na Mkoa wa Mara kwa ujumla” na kuongeza kuwa “Serikali inatambua mchango wa sekta binafsi katika maendeleo” amesema Mhe. Mtambi.  

Akizungumza katika hafla hiyo, Mhe. Mtambi ameitaka Halmashauri ya Wilaya ya Serengeti kuweka utaratibu mzuri wa matumizi ya magari hayo ili kuyawezesha kutoa huduma kwa Sekondari nyingi zaidi katika maeneo yao.

Aidha, Mhe. Mtambi kumpongeza mdau mwingine wa maendeleo aliyejitambulisha kama Mhandisi Stanley ambaye ameshiriki hafla hiyo na ambaye ameahidi kuchangia shilingi milioni 10 kwa ajili ya mafuta ya mabasi hayo. 

Wakati huo huo, Mhe. Mtambi amewahamasisha wananchi wa Mkoa wa Mara kushiriki uchaguzi mkuu wa Mwaka 2025 na kuwapongeza wananchi kwa kuonyesha mwamko mkubwa katika kujiandikisha, kampeni na uchaguzi na kuwataka kushiriki kupiga kura tarehe 29 Oktoba, 2025.

“Uchaguzi ni fursa ya kikatiba muitumie kuwachagua viongozi watakaowasaidia katika kupata maendeleo kwa kipindi cha miaka mitano ijayo” amesema Mhe. Mtambi.

Mhe. Mtambi ametumia fursa hiyo kuwahakikishia wananchi kuwa Serikali itahakikisha kuwa uchaguzi utafanyika kwa amani na utulivu na kuwaonya watu wanaopanga kuanzisha taharuki wakati huu wa uchaguzi kuwa Mkoa wa Mara sio sehemu ya kuchezea na kufanyia majaribio ya vurugu.

Kwa upande wake, Mwenyekiti na muasisi wa Taasisi hiyo Dkt. Rhino Simon Nyansaho amesema taasisi hiyo imetoa magari hayo kufuatia ahadi aliyeitoa katika mahafali ya shule hizo mwaka jana ambazo zilimpatia changamoto mbalimbali ambazo Taasisi hiyo imezitatua.

Changamoto hizo ni tatizo la maji, bweni la wasichana na mifuko ya saruji katika Shule ya Sekondari ya Machochwe na maji, kugharimia kambi ya wanafunzi wa kidato cha sita na saruji mifuko 500 katika Shule ya Sekondari ya Ngoreme.

Dkt. Nyansaho amesema taasisi yake imegharimia wanafunzi 1,200 waliomaliza kidato cha nne kutembelea Hifadhi ya Taifa ya Serengeti (SENAPA) na kuongeza kuwa kama mlezi wa Shule ya Sekondari ya Natta amesaidia kutuma maombi ya ufadhili Shirika la Hifadhi ya Taifa (TANAPA) ambalo limeahidi kutoa shilingi milioni 470 kwa ajili ya ujenzi wa jengo la utawala la shule hiyo.

Katika hafla hiyo, Mkuu wa Mkoa aliambatana na Katibu Tawala wa Mkoa wa Mara Ndugu Gerald Musabila Kusaya, viongozi wa Wilaya ya Serengeti, Halmashauri ya Wilaya ya Serengeti, Nyansaho Foundation, Chama cha Mapinduzi (CCM) na wananchi wa Wilaya ya Serengeti.