Mtambi aipongeza CDEA kwa kuanzisha Redio Butiama FM

Posted on: October 3rd, 2025

Mkuu wa Mkoa wa Mara Mhe. Kanali Evans Alfred Mtambi leo tarehe 03 Oktoba, 2025 ameongoza hafla ya ushirikishwaji wa jamii na uhamasishaji wa wadau wa redio ya Butiama FM na kuipongeza taasisi ya Culture and Development East Africa (CDEA) kwa kuianzisha Kituo cha redio katika Wilaya ya Butiama.  

Akizungumza katika hafla hiyo, Mhe. Mtambi Mhe. Mtambi amesema redio Butiama itakuwa kichocheo cha maendeleo ya jamii kutokana na faida mbalimbali zinazotokana na uwepo wake ikiwa ni pamoja na kutangaza biashara, tamaduni, utalii na fursa mbalimbali zilizopo katika Wilaya hiyo.

“Ninawapongeza kwa kuanzisha wazo hili na kuendelea kulifanyia kazi bila kukata tamaa mpaka hapa mlipofikia, baada ya matangazo kuanza angalieni uwezekano wa kupanua matangazo yasikike sehemu kubwa zaidi” amesema Mhe. Mtambi.

Mhe. Mtambi amewataka wadau matangazo katika kituo hicho yatakapoanza kukitumia kituo hicho kwa kutangaza shughuli zao na kulipa gharama za uendeshaji wa kituo hicho ili kiendelee kufanyakazi katika Wilaya ya Butiama.

Kanali Mtambi ameitaka Menejimenti ya Kituo cha Redio Butiama FM kuajiri Watangazaji na Waandishi wa Habari wenye ithibati ili waweze kuyatangaza mambo mazuri yaliyopo katika Wilaya ya Butiama na Mkoa wa Mara kwa ujumla.

Mhe. Mtambi amewashukuru wadau mbalimbali wanaochangia kwa hali na mali katika uanzishwaji wa kituo hicho akiwemo Rais wa Jamhuri ya Muungano wa Tanzania Dkt. Samia Suluhu Hassan, Ubalozi wa Norway na UNESCO na wanajamii wa Butiama.

Wakati huo huo, Mkuu wa Mkoa wa Mara Mhe. Kanali Evans Alfred Mtambi amesema Mamlaka ya Elimu ya Ufundi (VETA) Mkoa wa Mara imepunguza gharama za madereva wa bodaboda wanaotaka kujifunza udereva kutoka shilingi 70,000 hadi shilingi 30,000 na kuwahamasisha madereva hao kuchangamkia punguzo hilo.

“Serikali imechukua hatua hii kwa kutambua mchango mkubwa wa Maafisa Usafirishaji kwa maendeleo na ukuaji wa uchumi wa jamii na Taifa kutokana na kuimarisha mzunguko wa fedha, upatikanaji wa usafiri katika baadhi ya maeneo” amesema Mhe. Mtambi.

Mhe. Mtambi amewataka madereva wa pikipiki kuendesha biashara zao kwa kufuata misingi na miiko ya udereva ili kuweza kuokoa maisha ya watu na mali zao na kuwaletea maendeleo binafsi kutokana na biashara hiyo.

Mhe. Mtambi amewakaribisha wananchi wa Mkoa wa Mara kushiriki mapokezi na mikutano ya hadhara ya Mgombea urais kupitia Chama cha Mapinduzi (CCM) na Rais wa Jamhuri ya Muungano wa Tanzania Mhe. Samia Suluhu Hassan anayetarajia kuwa katika Mkoa wa Mara tarehe 9-10 Oktoba, 2025. 

Aidha, Mhe. Mtambi amewataka wananchi wa Butiama na Mkoa wa Mara kushiriki uchaguzi mkuu wa mwaka 2025 kwa kuwasilikiza wagombea na kuwachagua viongozi watakaowaongoza katika kipindi cha miaka mitano ijayo.

Mhe. Mtambi amewahakikishia wananchi wa Mkoa wa Mara kuwa kutokana na hatua zilizochukuliwa na Serikali kurekebisha miundombinu ya kupooza na kusambaza umeme katika Mikoa ya Kanda ya Ziwa, Suala la kukatika katika kwa umeme litakuwa historia hivi karibuni.

Katika Halfa hiyo, Mkuu wa Mkoa alitoa ahadi ya lita 200 za mafuta ya jenereta la kituo hicho huku mgombea ubunge jimbo la Butiama kupitia Chama cha Mapinduzi Dkt. Wilson Mahera akitoa shilingi 100,000 kwa ajili ya mafuta.

Kwa upande wake, Chifu wa Ukoo wa Burito Nyerere na Mlezi wa Familia ya Baba wa Taifa Mwalimu Julius Kambarage Nyerere, Chifu Japhet Wanzagi ameipongeza CDEA kwa kuanzisha Redio Butiama FM na kuileta katika Wilaya ya Butiama.

Chifu Wanzagi amewaomba wadau na wananchi wa Wilaya ya Butiama kukitumia kituo hicho katika kutangaza shughuli, fursa na biashara zao ili kiweze kusaidia kutoa mchango uliokusudiwa wa kuanzishwa kwa kituo hicho.

Aidha, Chifu Wanzagi ameuomba uongozi wa kituo hicho kuweka gharama nafuu za matangazo ili wadau wengi zaidi waweze kukitumia kituo hicho kujitangaza.

Kwa upande wake, Mwenyekiti wa Bodi ya CDEA na Butiama Redio FM Ndugu Madaraka Nyerere amesema kuanzishwa kwa redio hiyo kunatokana na ufadhili uliotolewa na UNESCO mwaka 2012 na mpaka sasa wanayo studio na vyombo vya kuendeshea matangazo.

Ndugu Madaraka Nyerere amesema kwa sasa wanategemea Mamlaka ya Mawasiliano Tanzania (TCRA) watafanya ukaguzi wao ili kutoa leseni ya uendeshaji wa kituo hicho na baada ya hapo matangazo katika kituo hicho yataanza rasmi.

Ndugu Madaraka amemshukuru Mkuu wa Mkoa wa Mara kwa kuweza kutenga muda na kushiriki na wadau wote walishiriki hafla hiyo kwa na kuwaomba kuchangia kwa hali na mali uendelevu wa kituo hicho.   

 Katika hafla hiyo, Mhe. Mtambi ameambatana na Mkuu wa Wilaya ya Butiama, Menejimenti ya Halmashauri ya Wilaya ya Butiama, Mgombea ubunge wa Jimbo la Butiama, Familia ya Baba wa Taifa Mwalimu Julius Kambara Nyerere, Viongozi wa CDEA na Butiama FM na wananchi wa Wilaya ya Butiama.