Kusaya aridhishwa na maendeleo ya ukarabati wa ofisi za Hazina Ndogo Mara

Posted on: November 27th, 2025

Katibu Tawala wa Mkoa wa Mara Ndugu Gerald Musabila Kusaya leo taraehe 27 Novemba, 2025 amefanya ukaguzi wa utekelezaji wa mradi wa ukarabati wa ofisi za Hazina Ngogo Mkoa wa Mara iliyopo katika Ofisi ya Mkuu wa Mkoa wa Mara na kuridhishwa na maendeleo ya utekelezaji wa mradi huo.

“Nimeangalia vigezo vyote katika ukarabati wa jengo hili, kazi iliyofanyika inaendana na thamani ya pesa iliyotolewa na Serikali kukarabati jengo hili, imefanyika kwa wakati na kwa ubora unaotakiwa, hongereni sana” amesema Ndugu Kusaya.

Akizungumza wakati wa ukaguzi wa jengo hilo, Ndugu Kusaya amempongeza fundi na wasimamizi wa mradi huo kwa namna walivyosimamia ukarabati wa jengo hilo.

Ndugu Kusaya amekitaka Kitengo cha Manunuzi na Ugavi kukamilisha ununuzi wa vifaa vilivyobakia kwa ubora unaotakiwa na kuwataka kuendelea kutafuta wazabuni zaidi wa kuleta vifaa hivyo katika mikoa ya Mwanza, Dodoma au Dar es Salaam.

Ndugu Kusaya amemtaka fundi aliyepewa kazi ya kukarabati jengo hilo kukamilisha kazi ya ukarabati wiki hii ili wiki ijayo akabidhi mradi huo ili jengo hilo liweze kuanza kutumika.

Wakati huo huo, Katibu Tawala wa Mkoa wa Mara amekagua ofisi ya madereva na walinzi na kuagiza Sehemu ya Utawala na Rasilimali Watu kufanya maboresho mbalimbali katika ofisi hizo.

Kwa upande wake, Meneja wa mradi huo, Mhandisi Baraka Mwashambwa ameeleza kuwa utekelezaji wa mradi huo mpaka sasa umefikia asilimia 95 na sehemu iliyobakia inasubiria vifaa  vilivyo katika hatua za manunuzi ili kuweza kufunga viyoyozi, mfumo wa Tehama na kufanya usafi.

“Ukarabati wa jengo hili umeanza tarehe 21/08/2025 na ulitegemewa kukamilika tarehe 20/11/2025 lakini umechelewa kutokana na kukosekana kwa vifaa vya kuwezesha kufunga viyoyozi, mfumo wa Tehama” amesema Mhandisi Mwashambwa.

Akizungumza katika ukaguzi huo, Mkuu wa Hazina Ndogo Mkoa wa Mara Ndugu Abubakar Shija Machalo ameishukuru Ofisi ya Mkuu wa Mkoa wa Mara kwa utekelezaji wa mradi huo kwa wakati kama ilivyokuwa imepangwa.

“Nitoe shukrani za dhati kwako Katibu Tawala wa Mkoa na Menejimenti ya Sekretarieti ya Mkoa wa Mara kwa jitihada ulizozifanya mpaka hatua ya mradi ilipofikia na kulingana na maelekezo yako, wiki ijayo tunategemea kurejea na kuanza kufanyia kazi katika jengo hili” amesema Ndugu Machalo.

Aidha, Ndugu Mashalo amempongeza mkandarasi na Meneja mradi kwa kutekeleza mradi huo kwa wakati na uaminifu kukmilisha mradi huu.

Ukarabati wa Ofisi ya Hazina Ndogo Mkoa wa Mara unatekelezwa kwa mfumo wa force account na unasimamiwa na Ofisi ya Mkuu wa Mkoa wa Mara ambayo ndio inamiliki wa jengo hilo, kwa gharama ya shilingi 127,369,360.80.