Kusaya aongoza kikao cha Baraza la Wafanyakazi

Posted on: November 26th, 2025

Katibu Tawala wa Mkoa wa Mara Ndugu Gerald Musabila Kusaya leo ameongoza kikao cha Baraza la Wafanyakazi la Ofisi ya Mkuu wa Mkoa wa Mara kilichofanyika katika Ukumbi wa Uwekezaji na kuwataka Makatibu Tawala wa Wilaya kuzisimamia Halmashauri kuendesha vikao vya mabaraza ya wafanyakazi kwa mujibu wa taratibu na miongozo ya Serikali.

Ndugu Kusaya ametoa agizo hilo baada ya kupokea taarifa kutoka Chama cha Wafanyakazi wa Afya na Serikali Kuu (TUGHE) kuhusiana na baadhi ya Halmashauri kuendesha vikao vya mabaraza ya wafanyakazi bila kuzingatia taratibu na miongozo ya uundaji na uendeshaji wa mabaraza hayo.

“Makatibu Tawala wa Wilaya simamieni mabaraza ya wafanyakazi katika Halmashauri mnazozisimamia ili kuhakikisha mabaraza hayo yanaendeshwa kwa kufuata taratibu na miongozo ya uendeshaji wake” amesema Ndugu Kusaya.

Ndugu Kusaya amemwagiza Katibu Tawala Msaidizi Sehemu ya Utawala kuziandikia barua Halmashauri zote za Mkoa wa Mara na kuzitaka ziwasilishe ratiba ya mabaraza ya Wafanyakazi ili aweze kushiriki katika vikao vya mabaraza ya wafanyakazi katika Halmashauri hizo.

Aidha, Ndugu Kusaya amewataka wajumbe wa kikao hicho kutekeleza maazimio yaliyofikiwa katika  kikao na kuwataka kuwaelimisha watumishi wengine kuhusiana na masuala mbalimbali yaliyojadiliwa katika kikao hicho.

Kwa upande wake, Mwenyekiti wa Chama cha Wafanyakazi wa Serikali Kuu na Afya (TUGHE) Mkoa wa Mara Ndugu John Bomani amempongeza Katibu Tawala wa Mkoa wa Mara kwa namna Mkoa unavyoendesha vikao vya Baraza la Wafanyakazi na kumuomba kufuatilia uendeshaji wa mabaraza ya wafanyakazi katika Halmashauri za Mkoa wa Mara.

“Baadhi ya Halmashauri kuna kasoro katika uundaji na uendeshaji wa mabaraza ya wafanyakazi yanakiuka taratibu za kisheria za uanzishwaji na uendeshaji wa mabaraza hayo” amesema Ndugu Bomani.

Ndugu Bomani pia amewataka wajumbe wa kikao hicho kushiriki kikamilifu mchakato wa uchaguzi mkuu wa TUGHE unaotegemewa kuanza hivi karibuni ili kupata viongozi watakaokiongoza chama hicho na kusimamia maslahi ya wafanyakazi.  

Akitoa elimu kuhusiana na UKIMWI na magonjwa yasiyoambukizwa mahala pa kazi, Mratibu wa UKIMWI, Homa ya Ini na Magonjwa ya Ngono Mkoa wa Mara Dkt. Edibily Mtatiro amewahamasisha wajumbe wa kikao hicho kupima na kupata chanjo za homa ya ini ili kuweza kuzuia maambukizi ya ugonjwa huo.

“Ugonjwa huu sio maarufu sana katika jamii japokuwa unasababisha vifo vingi kutokana na kuambukizwa kwa kutumia njia nyingi na mgonjwa anaugua na kufariki ndani ya muda mfupi” amesema Dkt. Mtatiro.

Dkt. Mtatiro amewahamasisha wajumbe wa Baraza la Wafanyakazi kupima afya zao na kupata chanjo ya homa ya ini mapema kabla ya kupata maambukizi kwani baada ya kuambukizwa hamna dawa ya kutibu ugonjwa huo isipokuwa kuna dawa za kupunguza makali tu.   

Akizungumzia kuhusu magonjwa yasiyoambukizwa Dkt. Mtatiro amewahamasisha wajumbe kula mlo kamili wenye vyakula vya wanga, mboga mboga na matunda kwa kiasi kulingana na shughuli wanazofanya kwa wakati huo.

Kikao cha Baraza la Wafanyakazi kimehudhuriwa na Wakuu wa Sehemu, Wakuu wa Vitengo, Makatibu Tawala wa Wilaya, Mwenyekiti wa TUGHE Mkoa wa Mara na watumishi wa Ofisi ya Mkuu wa Mkoa wa Mara ambao ni wajumbe wa kikao hicho.