Katibu Tawala Mkoa aridhishwa na ukarabati wa majengo

Posted on: September 29th, 2025

Katibu Tawala wa Mkoa wa Mara Ndugu Gerald Musabila Kusaya leo tarehe 29 Septemba, 2025 amekagua ukarabati wa ofisi za Hazina Ndogo Mkoa wa Mara na makazi ya Mkuu wa Mkoa unaotekelezwa na Ofisi ya Mkuu wa Mkoa wa Mara na kuridhishwa na kazi zinavyoendelea.

Akizungumza wakati wa ukaguzi huo, Ndugu Kusaya amesema hatua za ukarabati zilizofikiwa katika miradi hiyo ni nzuri ukilinganisha na mikataba ambayo ofisi yake iliingia na mafundi kuhusiana na ukarabati huo na kuwataka mafundi kukamilisha kazi yao mapema iwezekanavyo.

“Utekelezaji wa ukarabati huu umefanyika kwa wakati na ubora unaotakiwa, lakini sasa niwaombe tukamilishe kazi haraka ili majengo haya yaweze kutumika kwa shughuli zinazotarajiwa” amesema Ndugu Kusaya.

Akizungumza katika mradi wa ukarabati wa ofisi za Hazina, Ndugu Kusaya ameagiza wasimamizi wa mradi huo kuyafanyia usafi mazingira ya mradi ili kuondoa mawe, vifusi, mbao na vitu vingine ambavyo havihitajiki ili kuwawezesha mafundi kuweza kupita kwa urahisi na kuboresha mazingira ya ofisi ya Mkuu wa Mkoa wa Mara.

Aidha, Ndugu Kusaya ameagiza Kitengo cha Manunuzi kufuatilia utengenezaji wa milango na madirisha ya jengo hilo ili kazi ya ukarabati iweze kukamilika kwa wakati.

Akizungumza katika makazi ya Mkuu wa Mkoa, Ndugu Kusaya ameridhishwa na kasi ya ukarabati wa makazi hayo unaoendelea na kuagiza kuitwa wataalamu kutoka Wakala wa Ufundi na Umeme (TEMESA) na Shirika la Mawasiliano Tanzania (TTCL) ili kuweka vizuri nyaya za umeme na mawasiliano katika makazi hayo.  

Kwa upande wake, Mkuu wa Hazina Ndogo, Mkoa wa Mara Bwana Abubakar Shija Machalo amepongeza ushirikiano unaotolewa na Ofisi ya Mkuu wa Mkoa wa Mara katika ukarabati na upanuzi wa ofisi hiyo na kuahidi kufuatilia suala la mtaalamu wa mifumo kukagua maendeleo ya utekelezaji wa mradi huo ili atoe maelekezo ya kitaalamu.  

Bwana Machalo ameitaka Kamati inayosimamia utekelezaji wa mradi huo kuandaa taarifa ya utekelezaji wa mradi ili iweze kuwasilishwa Hazina ikiwa ni sehemu ya masharti ya makubaliano ya mkataba wa ukarabati wa jengo hilo kati ya Hazina na Ofisi ya Mkuu wa Mkoa wa Mara.

Awali akitoa taarifa za ukarabati wa jengo la Hazina Ndogo, Meneja wa Mradi huo Mhandisi Baraka Mwashambwa amesema ofisi hizo zimeanza kukarabatiwa siku 37 zilizopita kwa mkataba wa siku 90 kwa gharama ya zaidi ya shilingi milioni 127 na ukarabati huo unatumia mfumo wa force account.

Mhandisi Mashambwa amesema kwa sasa utekelezaji wa kazi ya ukarabati imefikia asilimia 50 na baadhi ya sehemu fundi anashindwa kuendelea wanasubiri ukaguzi wa mtaalamu wa mifumo kutoka Hazina na vifaa muhimu hususan milango na madirisha ambayo yanaendelea kutengenezwa.

Mhandisi Mashambwa amesema mradi huo wa ukarabati ulipangwa kukamilika ndani ya siku 90 lakini kama vifaa na mtaalamu wa mifumo atawahi kukagua na kuidhinisha, kazi inaweza kukamilika mapema zaidi.

Katika ukaguzi huo Katibu Tawala wa Mkoa ameambatana na Menejimenti ya Sekretarieti ya Mkoa, Kamati ya usimamizi wa miradi na Maafisa kutoka Ofisi ya Hazina Ndogo Mkoa wa Mara pamoja na mafundi wanaotekeleza miradi hiyo.