Chakula Shuleni Mkoa wa Mara ni Lazima- Kusaya

Posted on: September 2nd, 2025

Katibu Tawala wa Mkoa wa Mara Ndugu Gerald Musabila Kusaya leo ameongoza kikao cha Mkoa cha kupitia Programu Jumuishi ya Malezi, Makuzi na Maendeleo ya Awali ya Mtoto tarehe 02 Septemba, 2025 kilichofanyika katika Ukumbi wa Uwekezaji na kusistiza msimamo wa Mkoa wa Mara kuhusu utoaji wa chakula shuleni.

Akizungumza katika kikao hicho, Ndugu Kusaya amesema kwa sasa katika Mkoa wa Mara utoaji wa chakula shuleni ni lazima kwa wanafunzi wote kupata chakula na sio jambo la kujadili tena bali Halmashauri zitekeleze.

“Utoaji wa chakula shuleni ni maelekezo ya Serikali na ni jambo ambalo linalinda haki za watoto ili kuwawezesha kupata elimu vizuri, kwa Mkoa wa Mara hatutarudi nyuma tena Mkuu wa Mkoa alishatoa maelekezo, tutekeleze” amesema Ndugu Kusaya.

Ndugu Kusaya ameipongeza Halmashauri ya Wilaya ya Wilaya ya Serengeti kwa kufanikisha kuhamasisha wazazi na walezi katika uchangiaji wa chakula shuleni na kwa sasa watoto wote wa Halmashauri hiyo wanapata angalau mlo mmoja kwa siku.   

Aidha, Ndugu Kusaya amewakumbusha Wakurugenzi wa Halmashauri za Mkoa wa Mara kuandaa mabango yenye takwimu za utoaji wa chakula shuleni katika Halmashauri zao na kuyabandika ofisini kwao kama alivyoelekeza Mkuu wa Mkoa katika vikao vya awali.

Bwana Kusaya amewataka Wakurugenzi kuhakikisha kuwa watoto wote wanapata chakula na wazazi wote wanachangia chakula cha watoto wao wanapokuwa shule na kuwachukulia hatua wale wote ambao hawataki kuchangia chakula cha watoto.

Wakati huo huo, Katibu Tawala wa Mkoa wa Mara amepiga marufuku wanafunzi kushiriki ngoma na nyimbo ambazo haziendani na tamaduni na maadili ya Kitanzania na hususan katika matamasha na sherehe mbalimbali.

Bwana Kusaya amesema wanafunzi wote wa shule za msingi, sekondari na vyuo wasihusishwe na ngoma na nyimbo ambazo zinawadhalilisha na badala yake jamii iwaache wakikua watacheza wenyewe wakiwa na akili timamu.  

Ndugu Kusaya amewataka Wakurugenzi Watendaji wa Halmashauri za Mkoa wa Mara kufanya vikao na wadau kuhusu Programu ya Jumuishi ya Malezi na Makuzi na Maendeleo ya Awali ya Mtoto ili kupata taarifa jumuishi ya Halmashauri zao kuhusu utekelezaji wa programu hiyo.

Kwa upande wake, Afisa Lishe Mkoa wa Mara Bibi Grace Martin Mgongolwa amezipongeza Halmashauri kwa kuboresha utoaji wa chakula shuleni na kuzitaka kujikita zaidi kwenye utoaji wa chakula kwa wanafunzi wote na sio baadhi ya wanafunzi.

Bibi Mgongolwa ametoa mfano wa taarifa zilizowasilishwa kuwa kati ya wanafunzi 663,355 wa shuke za msingi za Mkoa wa Mara, wanafunzi 457,656 ambao ni sawa na asilimia 64 ndio wanapata chakula shuleni huku wanafunzi wengine hawapati chakula.

Bibi Mgongolwa amezitaka Halmashauri kuendelea kuhamasisha makundi mbalimbali ili kutekeleza afua ya uchangiaji wa chakula shuleni na kuwawezesha watoto wote kupata angalau mlo mmoja wakiwa shuleni.

Amezitaka Halmashauri kuwatumia wahudumu wa afya ngazi ya jamii ambao wengi wao wamejengewa uwezo katika masuala ya lishe na afya kwa ujumla ili waweze kusaidia katika kuhamasisha wananchi katika maeneo yao.

Kwa upande wake, Kaimu Mkurugenzi Mtendaji wa Halmashauri ya Serengeti Bwana Maulana Adam Kitambazi amesema  Halmashauri ya Wilaya ya Serengeti imefanikiwa kuhamasisha wazazi na walezi katika uchangiaji wa chakula shuleni kutokana na jitihada mbalimbali zilizochukuliwa na Halmashauri.

Bwana Kitambazi amesema Halmashauri ilitoa elimu kwa viongozi wa kimila na wazee maarufu, viongozi wa dini ambao wanasauti katika jamii ambao kwa sasa wanatumika kuwahamasisha wananchi kuchangia chakula shuleni.

“Kwa sasa shule zetu kwa asilimia 100 zinatoa chakula shuleni na wanafunzi wanaonyesha utofauti hata mahudhurio na ufaulu wao umeboreka ukilinganisha na hapo awali” amesema Bwana Katambanzi.

Aidha, amesema Halmashauri ilitunga sheria ndogo zinazowabana wananchi kuchangia chakula shuleni ambazo zinasimamiwa na Maafisa Watendaji wa Vijiji na Kata katika maeneo yao ambapo amesema wananchi waliokuwa hawachangii chakula shuleni wamekuwa wakilipishwa faini.

Bwana Katambazi amesema Maafisa Maendeleo ya Jamii na Ustawi wa Jamii walikuwa wanashiriki vikao vya wazazi katika shule zote ili kutoa elimu kwa wazazi hao kuhusu faida za watoto kupata chakula wakiwa shuleni.

Katika kikao hicho, Halmashauri za Mkoa wa Mara na baadhi ya mashirika yasiyo ya kiserikali ambayo ni wadau wa utekelezaji wa programu hiyo wamewasilisha taarifa za utekelezaji wa Programu Jumuishi ya Malezi, Makuzi na Maendeleo ya Mtoto katika kipindi cha Januari hadi Juni, 2025.

Walioshiriki kikao hicho ni baadhi ya wajumbe wa Menejimenti ya Mkoa na Maafisa Makatibu Tawala wa Wilaya, Waurugenzi wa Halmashauri, baaddhi ya maafisa wa Halmashauri, wadau mbalimbali wanaoshirikiana na Halmashauri katika utekelezaji wa programu hiyo.