Mwenge wa Uhuru kupitia miradi ya bilioni 26.6 Mara

Posted on: August 13th, 2025

Mkuu wa Mkoa wa Mara Mhe. Kanali Evans Alfred Mtambi leo ametoa taarifa kwa Waandishi wa Habari kuhusu maandalizi ya mapokezi ya Mwenge wa Uhuru na kueleza kuwa ukiwa katika Mkoa wa Mara Mwenge utapitia miradi 68 yenye thamani ya shilingi bilioni 26,547,598,285.42. 

Akizungumza katika mkutano huo uliofanyika ofisini kwake, Mhe. Mtambi amesema ukiwa katika Mkoa wa Mara, Mwenge wa Uhuru utakimbizwa umbali wa Kilomita 1,123 na utatembelea na kukagua, kuweka mawe ya msingi, kufungua na kuzindua miradi 68 ya maendeleo katika Halmashauri zote tisa.

“Ninawakaribisha wananchi wote wa Mkoa wa Mara kushiriki mapokezi ya Mwenge wa Uhuru yatakayofanyika katika Uwanja wa Shule ya Msingi Balili, Halmashauri ya Mji wa Bunda keshokutwa kuanzia saa 12 asubuhi” amesema Mhe. Mtambi.  

Mhe. Mtambi amesema Mkoa wa Mara utapokea Mwenge wa Uhuru kutoka Mkoa wa Simiyu tarehe 15 Agosti, 2025 katika Halmashauri ya Mji Bunda na kuukimbiza katika Halmashauri hadi tarehe 23 Agosti, 2025 na baadaye kuukabidhi Mwenge wa Uhuru Mkoa wa Mwanza tarehe 24 Agosti, 2025.

Kanali Mtambi ameitaja ratiba ya Mwenge wa Uhuru kuwa inanza tarehe 15 Agosti, 2025 ambapo Mwenge utakimbizwa Halmashauri ya Mji wa Bunda; tarehe 16 Agosti, 2025 Halmashauri ya Wilaya ya Musoma, tarehe 17 Agosti, 2025 Manispaa ya Musoma na tarehe 18 Agosti, 2025  Halmashauri ya Butiama.

Tarehe 19 Agosti, 2025 Halmashauri ya Wilaya ya Rorya; tarehe 20 Agosti, 2025 Halmashauri ya Mji wa Tarime; tarehe 21 Agosti, 2025 Halmashauri ya Wilaya ya Tarime; tarehe 22 Agosti, 2025 Halmashauri ya Wilaya ya Serengeti; na tarehe 23 Agosti, 2025 Halmashauri ya Wilaya ya Bunda.

Mhe. Mtambi amesema ukiwa Mara mwenge utakuwa umefika nyumbani na ukiwa katika Wilaya ya Butiama Mwenge wa Uhuru utatembelea nyumbani kwa Baba wa Taifa Mwalimu Julius Kambarage Nyerere na ukiwa hapo kama ilivyo kawaida utawasha Mwenge wa Mwitongo kwa mara ya 61 tangu mbio za Mwenge wa Uhuru zilipoanzishwa mwaka 1964.  

“Ninapenda kuwakaribisha wananchi wote wa Mkoa wa Mara na maeneo jirani kushuhudia kuwashwa kwa Mwenge wa Mwitongo kwa ajili ya kumuezi Baba wa Taifa na Muasisi wa Mwenge wa Uhuru tarehe 18 Agosti, 2025 kuanzia saa sita mchana.

Mhe. Mtambi ametumia fursa hiyo kuwaalika viongozi, watumishi wa Serikali, taasisi binafsi, mashirika yasiyo ya kiserikali, na wananchi wote kushiriki mbio za Mwenge wa Uhuru kwa kipindi chote utakapokuwa katika Mkoa wa Mara.

Aidha, Mhe. Mtambi amewahamasisha wananchi kushiriki kwenye Mbio za Mwenge wa Uhuru 2025 ili kupata ujumbe wa Mbio za Mwenge wa Uhuru unaolenga kuwahamasisha na kuwaelimisha kushiriki kwenye uchaguzi Mkuu chini ya kauli mbiu isemayo “Jitokeze kushiriki Uchaguzi Mkuu wa Mwaka 2025 kwa Amani na Utulivu” utakaotolewa na Wakimbiza Mwenge Kitaifa wakiongozwa na Ndugu Ismail Ali Ussi, Kiongozi wa Mbio za Mwenge Kitaifa 2025.