Miradi ya TACTIC kuboresha muonekano wa Musoma

Posted on: August 12th, 2025

Mkuu wa Mkoa wa Mara Mhe. Kanali Evans Alfred Mtambi leo tarehe 12 Agosti 2025 amekuwa mgeni rasmi katika hafla ya utiaji saini ujenzi wa Miradi ya Uboreshaji wa Miji Tanzania (TACTIC) katika Manispaa ya Musoma itakayogharimu shilingi bilioni 19.975.

Akizungumza katika hafla hiyo, Mhe. Mtambi amesema miradi hiyo inayotekelezwa katika Miji 45 hapa nchini inadhaminiwa na Benki ya Dunia na itakapokamilika itabadilisha  mandhari ya Manispaa ya Musoma.

“Binafsi nina furaha kubwa, maana ujenzi wa miradi hii ikiwamo Soko la Nyasho, barabara za ndani ya Manispaa na Stendi ya Bweri itasadia kubadilisha muonekano wa Manispaa ya Musoma” amesema Kanali Mtambi.

Mhe. Mtambi amesema miradi hii itakapokamilika italeta mabadiliko chanya kwa wananchi na wageni katika Manispaa ya Musoma na kuboresha mazingira ya biashara na kupandisha thamani ya maeneo husika itapanda na kuongeza mapato ya Manispaa ya Musoma.

Mhe. Mtambi amewataka viongozi na wataalamu kuisimamia vizuri miradi hiyo ili iweze kukamilika kwa wakati na kwa ubora na kumtaka mkandarasi wa miradi hiyo MS Henan Highway Engineering Group Company Limited kutekeleza mradi huo kwa ubora na kwa wakati kulingana na mkataba.

Awali akitoa taarifa ya mradi huo, Mkurugenzi wa Manispaa ya Musoma Ndugu Bosco Nduguru amesema mradi hiyo inatarajiwa kutekelezwa kwa muda wa miezi 15 kuanzia tarehe 15 Agosti, 2025 hadi Novemba, 2026 na itahusisha ujenzi wa miradi mikubwa mitatu pamoja na ofisi za usimamizi na uratibu wa ujenzi wa miradi hiyo.

Ndugu Ndunguru amesema miradi itakayojengwa katika Manispaa ya Musoma kupitia mradi wa TACTIC ni pamoja na barabara tatu za Mukendo, Shaabani na Musoma Bus –Saanane; Soko la Nyasho na Stendi ya Bweri.   

Hafla hiyo imehudhuriwa na Katibu Tawala wa Mkoa wa Mara, Naibu Katibu Mkuu anayeshughulikia miundombinu kutoka Ofisi ya Rais- TAMISEMI, Kamati ya Usalama ya Wilaya ya Musoma, viongozi wa Chama cha Mapinduzi Mkoa wa Mara, watumishi kutoka Ofisi ya Mkuu wa Mkoa wa Mara, Halmashauri ya Manispaa ya Musoma na Mkandarasi wa miradi hiyo.