Kusaya ateta na viongozi wa Bodi ya Mkonge

Posted on: August 14th, 2025

Katibu Tawala wa Mkoa wa Mara Ndugu Gerald Musabila Kusaya leo amempokea na kuzungumza na Mkurugenzi Mkuu wa Bodi ya Mkonge Tanzania Ndugu Sady H. Kambona aliyetembelea ofisini kwake  ikiwa ni sehemu ya kuhamasisha kilimo cha zao la mkonge katika Mkoa wa Mara.

Akizungumza na ugeni huo, Ndugu Musabila amesema wakulima wa Mkoa wa Mara wapo tayari kuwekeza katika kilimo cha mkonge kama watapata uhakika wa soko la zao hilo bila ya kulazimika kuvusha kwa magendo kwenda katika nchi jirani kutafuta masoko.

“Soko la mkonge likiwa ni la uhakika hapa nchini litahamasisha wakulima wengi zaidi kuwekeza katika kilimo cha mkonge na kuwasaidia kuuza kwa bei nzuri kuliko hivi sasa ambapo Mkoa hauna soko la uhakika la mkonge” amesema Bwana Kusaya.

Ndugu Kusaya amesema kutokana na hali ya hewa ya Mkoa wa Mara mkonge unaweza kustawi vizuri  hususan katika Wilaya ya Bunda ambayo ina hali ya ukame muda mwingi jambo ambalo linaweza kuufanya mkonge kuwa zao kuu la biashara kwa wakulima.

Bwana Kusaya ameipongeza Bodi hiyo kwa kufanya ufuatiliaji wa maendeleo ya zao la mkonge kwa mikoa mbalimbali inayoweza kulima zao hilo ili kujionea hali halisi iliyopo katika maeneo hayo na kutatua changamoto zinazowakabili wakulima.

Kwa upande wake, Bwana Kambona amesema kuwa kwa sasa kwa sababu wakulima wa Mkoa wa Mara wanauza mkonge kiholela Halmashauri za Mkoa wa Mara zitakuwa hazinufaiki na kilimo cha mkonge kwa kuwa hazikusanyi mapato yanayotokana na uuzaji wa zao la mkonge.

Bwana Kambona ameshauri Halmashauri kutunga sheria ndogo ili kuweza kunufaika katika kilimo cha zao la mkonge na kuwahamasisha wakulima kuwekeza katika zao hilo ambalo amesema mbali na kutoa nyuzi za mkonge mabaki yake yanaweza kutengenezwa na kuwa chakula cha mifugo na hivyo kuongeza thamani zaidi ya zao hilo.

Ndugu Kambona amesema kwa sasa Serikali imewekeza katika kuanzisha vituo vya uzalishaji na kuunda vyama vya ushirika vya wakulima wa mkonge na kuwawezesha wakulima hata wa kiasi kidogo kufaidika na mkonge wao.  

Ndugu Kambona ameutaka Mkoa wa Mara kwa kuanzia kuwahamasisha wakulima kupanda mikonge katika mipaka ya mashamba yao ili kufaidika na mauzo ya zao hilo huku likilinda mipaka ya mashamba yao.

Kwa upande wake, Kaimu Katibu Tawala Msaidizi Sehemu ya Uchumi na Uzalishaji Mhandisi Mwita Okayo amesema Mkoa wa Mara unao wakulima wa zao la mkonge hata hivyo kutokana na kukosekana kwa soko la uhakika wakulima hao wanauza mkonge wao kwa njia za magendo katika nchi jirani.

Mhandisi Okayo amesema wakulima wa Mkoa wa Mara baada ya kuhamasishwa mwaka 2011 kulima zao la mkonge waliitikia wito hata hivyo hamna wanunuzi wa zao hilo waliokuwa wananunua mkonge katika Mkoa wa Mara na hivyo kuwakatisha tamaa wakulima zaidi kulima zao hilo.

Mhandisi Okayo amezitaja Wilaya ambazo zinalima mkonge kuwa ni pamoja na Rorya, Bunda, Butiama, Tarime na Serengeti ambazo zina wakulima wadogo wadogo wengi na kumtaka kiongozi huyo wa Bodi ya Mkonge kukutana na wakulima ili kuwatia moyo kuhusu upatikanaji wa soko la uhakika na jitihada za bodi hiyo kuinua zao hilo katika Mkoa wa Mara.

Mhandisi Okayo ameiomba bodi hiyo kujenga kituo cha kuzalishia mkonge katika Wilaya ya Butiama ili wakulima wa Mkoa wa Mara waweze kupata urahisi wa kuuza mkonge wao. 

Katika kikao hicho, Bwana Kambona aliambatana na Afisa Mwandamizi kutoka Bodi ya Mkonge na mmoja wa wanunuzi wa zao la mkonge ambaye amefanya ziara ili kujionea hali halisi ya soko la mkonge katika Mkoa wa Mara.