Mwenge wakagua miradi ya bilioni 6 Musoma

Posted on: August 18th, 2025

Mbio za Mwenge wa Uhuru zimeendelea katika Mkoa wa Mara ambapo katika Wilaya ya Musoma Mwenge wa Uhuru umekagua miradi yenye thamani ya zaidi ya shilingi bilioni 6.

Ukiwa katika Halmashauri ya Wilaya ya Musoma tarehe 16 Agosti, 2025 Mwenge wa Uhuru imepitia miradi saba yenye thamani ya shilingi 2,562,794,529.18 ambayo imetekelezwa kwa michango ya  wananchi shilingi 31,927,000.00; mapato ya ndani ya Halmashauri 233,395,000.00; Serikali Kuu 1,699,192,500.00 na wahisani wa maendeleo 598,280,029.00.

Mwenge wa Uhuru katika Halmashauri ya Wilaya ya Musoma umezindua mradi wa kikundi cha vijana cha Kaburabura cha uchenjuaji wa madini, umeweka jiwe la msingi katika mradi wa maji wa Kijiji cha Muhoji; umezindua daraja la barabara ya Msinono-Kinyang’erere; na umezindua mradi wa ufugaji wa samaki kwa njia ya vizimba wa Nyamangati Agro Farm.

Aidha, Mwenge wa Uhuru umezindua ofisi za Kijiji cha Kwibara; umeweka jiwe la msingi Shule ya Sekondari Kurwaki na Kituo cha Afya Kiriba na Mkesha wa Mwenge wa Uhuru ukafanyika katika uwanja wa Shule ya Msingi Bwai.

Ukiwa katika Manispaa ya Musoma tarehe 17 Agosti, 2025, Mwenge wa Uhuru umetembelea miradi nane ya maendeleo yenye thamani ya shilingi 3,591,239,074.94 ambayo imegharimiwa na wananchi 58,400,000.00; mapato ya ndani ya Halmashauri 129,402,800.00; na Serikali kuu 3,403,436,274.93.

Miradi iliyotembelewa katika Manispaa ya Musoma ni utunzaji wa mazingira katika chanzo cha maji Bukanga- Makoko; mradi wa vizimba vya ufugaji samaki eneo la lake side; umezindua majengo matatu katika Hospitali ya Manispaa ya Musoma; na kufungua ofisi ya Mtendaji wa Mwigobero D.

Aidha, Mwenge wa Uhuru umetembelea mradi wa kikundi cha Umoja wa Mafundi Welding Nyakato-Maziwa; umeweka jiwe la msingi katika mradi wa ujenzi wa barabara kwa kiwango cha lami ya Mahakamu Kuu-Nyabisare; umetembelea mradi wa hifadhi ya mazingira na matumizi ya nishati safi Chuo cha Maendeleo ya Wananchi (FDC) Musoma na umeweka jiwe la msingi mradi wa Shule ya Sekondari Bubwemo.

Mkesha wa Mwenge wa Uhuru katika Manispaa ya Musoma umefanyika katika uwanja wa Shule ya Sekondari ya Mara na kwa sasa Mwenge umekabidhiwa katika Wilaya ya Butiama kuendelea na mbio zake.