TISEZA yazindua dawati la uwekezaji Mara

Posted on: January 27th, 2026

Mamlaka ya Uwekezaji na Maeneo Maalum ya Kiuchumi Tanzania (TISEZA) leo tarehe 26 Januari, 2026 imefanya semina na wadau wa uwekezaji katika Mkoa wa Mara kwa ajili ya kuhamasisha uwekezaji katika sekta mbalimbali za kiuchumi zilizopo hapa nchini na imezindua rasmi Dawati la Uwekezaji la Mkoa wa Mara.

Akizungumza wakati wa uzinduzi wa Dawati la Uwekezaji Mkoa wa Mara, Mwenyekiti wa Bodi ya TISEZA Balozi Dkt. Aziz Mlima amesema mamlaka hiyo inalenga kuwawezesha Watanzania kutumia fursa za uwekezaji kwa kuwapa unafuu wa mitaji kutokana na punguzo la kodi na ushuru wa forodha.

“Lengo la Serikali ni kuongeza idadi ya wawekezaji ili kutekeleza Dira ya 2050 ambayo inalenga kukuza uchumi wa Tanzania kufikia Dola za Kimarekani zaidi ya Trilioni 1 kwa kuongeza wawekezaji wa ndani” amesema Dkt. Mlima.  

Dkt. Mlima amesema Serikali imechukua hatua za makusudi kuboresha mazingira ya uwekezaji ili kuwahamasisha Watanzania zaidi kushiriki katika uwekezaji kwa kuwapa misamaha ya kodi na punguzo la ushuru wa forodha kwa baadhi ya bidhaa zinazotumika katika miradi ya uwekezaji jambo ambalo amesema linalenga kuchochea wawekezaji zaidi.  

Dkt. Mlima pia amempongeza Mwekezaji wa Mkoa wa Mara Ndugu Emille Gotham kwa kuanzisha mchakato wa kuwekeza katika uzalishaji wa chakula cha samaki MKoa wa Mara na kumhakikishia kuwa soko la uhakika kutokana na serikali kuwahamasisha wananchi kufuga samaki katika vizimba na kwa sasa chakula hicho kinatoka nje ya Tanzania.

Kwa upande wake, Kaimu Mkurugenzi Uhamasishaji Uwekezaji TISEZA Ndugu Geore Mukono amesema  kuwa kampeni hiyo itaonyesha fursa mbalimbali zilizopo katika mikoa, taratibu za usajili wa miradi ya uwekezaji kwa lengo la kupata vyeti vya uwekezaji na leseni katika maeneo maalum ya kiuchumi, vivutio vya kikodi na visivyo vya kikodi vinavyotolewa kwa wawekezaji hapa nchini.

Ndugu Mukono amesema wawekezaji watakaojisajiri watakapa unafuu wa ushuru wa forodha hadi asilimia 100 na msamaha wa kodi hadi asilimia 75 katika vifaa vinavyotumika katika uwekezaji baada ya mradi husika kusajiliwa.

Ndugu Mukono ametolea mfano wawekezaji katika ufugaji wa samaki kwa njia ya vizimba wanaweza kupata msamaha wa kodi hadi asilimia 75 katika ununuzi wa maboti, injini, ndoano, magari ya kusafirishia samaki, vizimba, neti na kadhalika.

Kwa upande wake, Kaimu Katibu Tawala Msaidizi Sehemu ya Biashara, Viwanda na Uwekezaji Ndugu Gambaless Timotheo amesema ameishukuru TISEZA kwa kuhamasisha uwekezaji katika Mkoa wa Mara na kuwataka wafanyabiashara na taasisi za kifedha kushirikiana kuanzisha miradi ya uwekezaji.

Ndugu Gambales ameishukuru TISEZA kwa kuzindua Dawati la Uwekezaji Mkoa wa Mara na kuahidi kuwa Mkoa wa Mara utawasaidia Watanzania wanaotaka kuwekeza kupata taarifa na msaada watakaohitaji.

Kwa upande wake, Mfanyabiashara Annastazia Omollo Mkazi wa Manispaa ya Musoma ameitaka TISEZA kupeleka fursa za uwekezaji katika maeneo ya vijijini ili wananchi wengi zaidi waweze kuzisikia na kuchangamkia fursa hizo.

“Wananchi wengi wa vijijini wanakosa fursa za kiuchumi kwa sababu ya kutofikiwa na programu mbalimbali za Serikali na wadau zinazotolewa “ amesema Ndugu Omollo na kuishauri TISEZA kuhakikisha wananchi waliopo vijijini wanapata fursa hiyo.

Ndugu Omollo amesema vijijini kuwa wakulima na wafugaji wengi wenye mashamba makubwa na wanaomiliki idadi kubwa ya mifugo ambao wakipata elimu watafanya shughuli zao kisasa na kuwekeza zaidi katika shughuli zao na kunufaika na fursa mbalimbali zinazotolewa na TISEZA na taasisi nyingine.

Kwa upande wake Mwenyekiti wa Chemba ya Bishara Mkoa wa Mara Ndugu Denis Nyakisinda amesema taasisi hiyo imeandaa tukio la kukutana kati ya Wafanyabiashara wa Mkoa wa Mara na watendaji wa taasisi zote za Serikali litakalofanyika mwezi Februari, 2026 kna kuwataka wafanyabiashara wote kujitokeza kushiriki tukio hilo.

Aidha, Ndugu Nyakisinda amesema kuwa taasisi hiyo inaandaa kongamano la Wafanyabiashara Mkoa wa Mara hivi karibuni na kuwataka wafanyabiashara wa Mkoa wa Mara kujiunga na taasisi hiyo na kushiriki matukio hayo ili kupata taarifa.

Semina hiyo ni sehemu ya Kampeni ya Kitaifa ya Uhamasishaji Uwekezaji wa Ndani iliyoanza tarehe 18 Januari, 2026 hadi tarehe 09 Aprili, 2026 itaendeshwa katika Mikoa yote ya Tanzania Bara na imeanza kutekelezwa katika Mikoa ya Kanda ya Ziwa ikiwa na Kauli mbiu ”Unawezeshwa Kuwekeza kwa kupewa Unafuu wa Mtaji”