Mtambi awataka wananchi kutoa ushirikiano kwa wawekezaji

Posted on: January 1st, 2026

Mkuu wa Mkoa wa Mara Mhe. Kanali Evans Alfred Mtambi leo tarehe 01 Januari, 2026 amezindua kituo cha Mafuta cha GBP katika eneo la Makutano ya Juu, Wilaya ya Butiama na kuwataka wananchi wa Mkoa wa Mara kutoa ushirikiano kwa wawekezaji waliopo katika maeneo yao.

Akizungumza wakati wa uzinduzi wa kituo hicho Mhe. Mtambi amesema wawekezaji wanafaida kubwa kwa jamii inayowazunguka ikiwa ni pamoja na kupata bidhaa na `huduma kjirani na maeneo yao jambo ambalo amesema bila uwekezaji huo wangefuata bidhaa au huduma hizo mbali na kuwaongezea gharama.

“Kwa mfano kituo hiki cha mafuta kisingekuwepo mngelazimika kufuata mafuta mbali na hapa jambo ambalo lingewaongezea gharama, lakini pia kimetoa ajira kwa vijana wa Mkoa wa Mara na Butiama kisingekuwepo na ajira zisingekuwepo” amesema Mhe. Mtambi.

Mhe. Mtambi amewakemea wanaoharibu mali za wawekezaji kwa kuwa faida ya uwekezaji wowote ule inaenda hadi kwa jamii inayozunguka uwekezaji huo na kuwaletea manufaa jamii husika na hivyo ni muhimu wananchi kulinda uwekezaji wa Serikali na kampuni binafsi uliopo katika maeneo yao kwa kuwa unamanufaa kwao.  

Mkuu wa Mkoa amewahamasisha wananchi kukumbuka kuwa suala la kuilinda nchi ya Tanzania ni jukumu lao kwani suala la ulinzi wa nchi ni la wananchi wote na vyombo vya ulinzi vinajukumu la kutoa uongozi na utaalamu kuhusiana na namna bora ya kulinda nchi.

Kanali Mtambi amewataka wananchi na hususan Maafisa Usafirishaji kuacha kutumika na watu wabaya kuharibu miundombinu iliyojengwa katika maeneo yao kwani uwekezaji huo umefanyika kwa manufaa yao kwa kuwa Serikali inahakikisha katika uwekezaji wowote unaofanyika, mwananchi anafaidika.

Mhe. Mtambi amesema uwekezaji wa Kampuni ya GBP hapa nchini unatokana na  sheria na sera nzuri za Serikali ya Awamu ya Sita inayoongozwa na Mhe. Dkt. Samia Suluhu Hassan, Rais wa Jamhuri ya Muungano wa Tanzania kuvutia wawekezaji kutoka ndani na nje ya nchi kuwekeza Tanzania.

Mhe. Mtambi ameipongeza Kampuni ya GBP kwa kuwekeza katika Mkoa wa Mara na kuwahamasisha wawekezaji wengine kuwekeza katika fursa mbalimbali zilizopo katika Mkoa wa Mara katika sekta za madini, utalii, usafirishaji na huduma mbalimbali.  

Wakati huo huo, Mkuu wa Mkoa wa Mara amewapongeza viongozi, wadau na wananchi wa Wilaya ya Butiama kwa amani na utulivu waliyoionyesha wakati na baada ya uchaguzi mkuu wa mwaka 2025 jambo ambalo amesema ni mfano wa kuigwa.

“Wakati tunahangaika kuhakikisha amani na utulivu vipo katika Mkoa wa Mara, wananchi wa Wilaya ya Butiama walikuwa wakiendelea na shughuli zao za uzalishaji mali na kuonyesha ukomavu wa kisiasa wa kuigwa na wapenda amani wote hapa nchini” amesema Mhe. Mtambi.

Akizungumza wakaati wa kumkaribisha Mkuu wa Mkoa, Mkuu wa Wilaya ya Butiama Mhe. Thecla Mkuchika ameipongeza Kampuni ya GBP kuwekeza katika Wilaya ya Butiama na kuwahakikishia kuwa Butiama ni sehemu sahihi ya uwekezaji.

Mhe. Mkuchika amewataka wananchi wa Wilaya ya Butiama na Mkoa wa Mara kwa ujumla kutumia kituo hicho cha mafuta katika kupata huduma mbalimbali za kisasa na mafuta yenye ubora wa uhakika.  

Kwa upande wake, Afisa Ufuatiliaji wa Kampuni ya GBP Tanzania Ndugu Dawood Sadikot amesema kambpuni hiyo ina uzoefu wa uuzaji wa mafuta hapa nchini kwa zaidi ya miaka 25 na imeajiri ajira za moja kwa moja watumishi zaidi ya 1,000.

“Ujenzi wa kituo hiki ni mwendelezo wa biashara zetu nchini Tanzania na tunaishukuru Serikali kwa kuweka mazingira mazingira mazuri ya uwekezaji yanayowawezesha kuwekeza na kusaidia katika ujenzi wa Tanzania” amesema Ndugu Sadikot.

Ndugu Sadikot amesema kampuni hiyo inajivunia wafanyakazi wake kwa kufanya kazi kwa nidhamu, uadilifu, weledi na kutoa huduma bora kwa wateja hapa nchini na kuwataka wananchi wa Wilaya ya Butiama kukitumia kituo hicho kupata huduma za kisasa.

 Hafla ya uzinduzi wa Kituo cha Mafuta cha GBP imehudhuliwa pia na Kamati ya Usalama ya Wilaya ya Butiama, Mbunge wa Jimbo la Butiama Dkt. Charles Wilson Mahera, Maafisa kutoka Ofisi ya Mkuu wa Mkoa wa Mara na Halmashauri ya Wilaya ya Butiama.