Mtambi aiomba Wizara ya Maji kuongeza uwekezaji katika miradi ya maji Mara

Posted on: January 5th, 2026

Mkuu wa Mkoa wa Mara Mhe. Kanali Evans Alfred Mtambi leo tarehe 05 Januari, 2026 amempokea na kufanya mazungumzo na Naibu Waziri wa Maji, Mhe. Kundo Mathew na kuiomba Wizara ya Maji kuwekeza katika miradi zaidi ya maji katika baadhi ya maeneo ya Wilaya za Musoma, Serengeti, Rorya, Tarime na Bunda.

Akizungumza wakati wa mapokezi hayo, Mhe. Mtambi amesema kwa sasa upatikanaji wa maji katika Mkoa wa Mara ni mzuri lakini kuna baadhi ya vijiji katika wilaya hizo havijafikiwa na mtandao wa miradi ya maji na hivyo kuyafanya maeneo hayo kukosa maji.

“Hali ya upatikanaji wa maji katika maeneo mengi ya Mkoa wa Mara ni nzuri lakini kuna baadhi ya maeneo katika Wilaya za Musoma, Serengeti, Rorya, Tarime na Bunda wananchi hawana maji safi na salama ya uhakika na baadhi ya maeneo haya miradi mikubwa imeanza kutekelezwa lakini haijakamilika” amesema Mhe. Mtambi.

Kanali Mtambi ameiomba Serikali kukamilisha kwa wakati miradi ya kimkakati ya maji itakayohudumia wananchi katika wilaya za Rorya, Tarime na mradi wa maji wa Serengeti ili wananchi wa Wilaya hizo waweze kupata maji ya uhakika.

Mhe. Mtambi amesema wananchi wanaokosa maji ya uhakika, wakipata maji itawasaidia kutumia muda wao katika shughuli za kiuchumi na kuboresha upatikanaji wa maji ambayo amesema ni huduma muhimu katika maisha ya wananchi.

Kwa upande wake, Naibu Waziri wa Maji Mhe. Kundo Mathew amesema kwa sasa Wizara ya Maji ina mkakati madhubuti wa kuboresha upatikanaji wa huduma za maji katika maeneo yote hapa nchini ambapo viongozi na wataalamu wanafanya ziara kwa lengo la kubaini mahitaji halisi ya wananchi ili kubuni miradi itakayotatua tatizo hilo.

Mhe. Mathew amesema baada ya ziara hizo Wizara itapanga miradi ya maji kulingana na mahitaji halisi ya wananchi katika Mikoa yote hapa nchini na kuahidi kuwa Serikali itahakikisha miradi ya mikubwa ya maji inayotekelezwa katika Mkoa wa Mara itakamilika kwa wakati ili ianze kutoa huduma kwa wananchi. 

Mhe. Mathew amezitaka Mamlaka zote za maji nchini kufanya mapitio ya vyanzo vya maji na kuangalia hali yake kwa ujumla pamoja na kubuni vyanzo mbadala vya maji pale ambapo vyanzo vilivyopo havitoshelezi mahitaji ya sasa na yanayotarajiwa ya wananchi.

Mhe. Mathew amewataka watendaji wa sekta ya maji kuacha kufanya kazi kwa dharura na badala yake wafanyekazi kwa mpangilio endelevu na sahihi ili kuongeza ufanisi katika sekta ya maji nchini.

Katika mapokezi hayo Mhe. Mathew ameambatana na maafisa kutoka Ofisi ya Mkuu wa Mkoa wa Mara, taasisi za RUWASA, Ofisi za Bonde la Ziwa Victoria Mkoa wa Mara, Mamlaka ya Maji na Usafi wa Mazingira Musoma (MUWASA), Mamlaka ya Maji na Usafi wa Mazingira ya Mji wa Bunda (BUWSSA), na Mamlaka ya Maji Mgango- Kiabakari.