Mara yapokea mbio za Mwenge wa Uhuru

Posted on: August 15th, 2025

Katibu Tawala wa Mkoa wa Mara Ndugu Gerald Musabila Kusaya leo tarehe 15 Agosti, 2025 amepokea Mwenge wa Uhuru kutoka kwa Katibu Tawala wa Mkoa wa Simiyu Ndugu Prisca Joseph Kayombo katika uwanja wa Shule ya Msingi Balili, Kata ya Nyamakokoto, Halmashauri ya Mji wa Bunda, Wilaya ya Bunda.

Akizungumza wakati wa mapokezi ya Mbio za Mwenge wa Uhuru, Ndugu Kusaya amewahamasisha wananchi wa Mkoa wa Mara kushiriki uchaguzi mkuu wa mwaka 2025 ili kutumia haki yao ya kikatiba na kidemokrasia kuwachagua viongozi mbalimbali watakaoliongoza Taifa kwa miaka mitano ijayo.

Ndugu Kusaya amesema Mkoa wa Mara umejipanga vizuri kwa ajili ya uchaguzi mkuu wa mwaka 2025 na mpaka sasa mafunzo kwa ajili ya wasimamizi wa uchaguzi ngazi ya jimbo wamepatiwa mafunzo ya usimamizi wa uchaguzi na mafunzo ya wasimamizi ngazi ya kata yanaendelea.

“Kwa kuzingatia kuwa zoezi la uchaguzi ni shirikishi, vikao vya wadau mbalimbali wa uchaguzi katika Mkoa wa Mara vimefanyika na vitaendelea kufanyika” amesema Bwana Kusaya  kuwahamasisha wananchi kujitokeza kwa wingi kupiga kura tarehe 29 Oktoba, 2025.

Aidha, Bwana Kusaya amewataka wananchi kutunza  kadi ya mpiga kura, kushiriki katika mikutano ya kampeni ili kuwasiliza wagombea, kujiepusha na vitendo vya uvunjifu wa amani, kuheshimu, kuzingatia katiba, sheria, kanuni na maelekezo yatakayotolewa na Tume Huru ya Taifa ya Uchaguzi, kuepuka vitendo vya rushwa na kushirikiana na viongozi watakaochaguliwa.

Ndugu Kusaya amesema Mwenge ukiwa katika Mkoa wa Mara utakimbizwa katika umbali wa kilomita 1,123 na utatembelea miradi 68 ya maendeleo yenye thamani ya shilingi 26,547,598,285.42 katika sekta za elimu, afya, maji, ujenzi, kilimo, mifugo, mazingira, ustawi wa jamii, viwanda na biashara.

Ndugu Kusaya amesema Mwenge wa Uhuru ukiwa katika Mkoa wa Mara utapita nyumbani kwa Baba wa Taifa Mwalimu Julius Kambarage Nyerere, Mwitongo, Butiama na ukiwa hapo utapata nafasi ya kuwasha Mwenge wa Mwitongo.

“Ndugu kiongozi wa mbio za Mwenge Kitaifa ukiwa Mwitongo utapata nafasi ya kuzuru na kuweka mashada ya maua katika kaburi la Baba wa Taifa na kutembelea makumbusho ya Baba wa Taifa na kupata historia ya Baba wa Taifa” amesema Ndugu Kusaya.

Ndugu Kusaya amechukua fursa hiyo kuwakaribisha viongozi na wananchi wa Mkoa wa Mara na Simiyu kushiriki tukio la kuwashwa kwa Mwenge wa Mwitongo siku ya Jumatatu tarehe 18 Agosti, 2025 kuanzia saa sita mchana.

Kwa upande wake, Katibu Tawala wa Mkoa wa Simiyu Ndugu Kayombo amesema Mwenge wa Uhuru ukiwa katika Mkoa wa Simiyu umekimbizwa katika Halmashauri sita kwa siku sita na kuwapongeza wakimbiza Mwenge wa Uhuru kwa kazi kubwa waliyoifanya katika Mkoa wa Simiyu.

Baada ya mapokezi hayo, Bwana Kusaya amekabidhi Mwenge wa Uhuru kwa Katibu Tawala wa Wilaya ya Bunda Ndugu Salum Khalfan Mtelala kwa ajili ya kuendelea na mbio zake katika Halmashauri ya Mji wa Bunda na mkesha wa Mwenge wa Uhuru unatarajiwa kufanyika Shule ya Msingi Miembeni.

Hafla ya mapokezi ya Mbio za Mwenge wa Uhuru zimehudhuriwa na Kamati ya Usalama ya Mkoa wa Mara, Wakuu wa Wilaya za Mkoa wa Mara, Viongozi wa Vyama vya Siasa wakiongozwa na Mwenyekiti wa CCM Mkoa wa Mara Mhe. Chandi Patrick Marwa, Menejimenti ya Sekretarieti ya Mkoa wa Mara, viongozi, watumishi, wadau na wananchi mbalimbali kutoka mikoa ya Mara na Simiyu.  

 Kauli mbiu ya Mbio za Mwenge wa Uhuru kitaifa mwaka huu ni “Jitokeze Kushiriki Uchaguzi Mkuu wa Mwaka 2025 kwa Amani na Utulivu” na Mwenge utakimbizwa katika Halmashauri zote tisa hadi tarehe 23 Agosti, 2025 na kukabidhiwa katika Mkoa wa Mwanza tarehe 24 Agosti, 2025 kuendelea na mbio zake.