Maambukizi ya UKIMWI katika Wilaya ya Bunda yamepungua

Posted on: August 16th, 2025

Adeladius Makwega BUNDA MARA

Mkuu wa Wilaya ya Bunda Mhe. Aswege Enock Kaminyonge tarehe 15 Agosti, 2025 amesema kiwango cha maambukizi ya virusi vya HIV na UKIMWI katika Wilaya ya Bunda kimepungua kutoka asilimia 2.4 hadi asilimia 1.5 kutokana na jitahada za pamoja kwa ushirikiano thabiti, baina wa wananchi, wadau na Serikali ya inayoongozwa na Chama cha Mapinduzi (CCM).

Mhe. Kaminyonge akizungumzia takwimu za upimaji wa magonjwa amesisitiza kuwa zoezi la upimaji wa VVU na UKIMWI kwa hiari katika Mbio za Mwenge wa uhuru linafanyika, hivyo basi mara baada ya Mwenge kwenda Halmashauri nyingine Halmashauri ya Mji wa Bunda itakuwa na takwimu juu ya muitikio wa wananchi katika zoezi hili.

Akizungumza akizungumza kwa nyakati tofauti, Kiongozi wa Mbio za Mwenge wa Uhuru Ndugu Ussi amesema ameipongeza Halmashauri ya Mji wa Bunda kwa kutekeleza miradi yenye ubora kwa kuzingatia vigezo vya Serikali na kuwataka wananchi wa Wilaya ya Bunda kutembea kifua mbele.

“Huo ubora wa miradi yenu, ndiyo shabaha ya serikali yetu, jamani endeleeni kufanya kazi kwa bidii” amesema Bwana Ussi.

Ndugu Ussi aamesisitiza suala la afya kwa kila Mtanzania kujitahidi kufuata kanuni na maelekezo ya wataalamu wa afya ili baada ya kuwa na afya bora wananchi wajikite kufanya kazi zao za maendeleo bila kikwazo chochote.

“Tujikinge na VVU na UKIMWI na ndiyo maana kumekuwa na semina na mafunzo kadhaa kwa shule 37 na pia kutoa elimu kwa kutumia video, senema na vipeperushi, huku kwa sasa kukiwa na mabanda ya kutoa ushauri wa afya ikiwamo upimaji magonjwa mbalimbali ”amesema Ndugu Ussi.

Akisoma Risala ya Utii Kwa Rais wa Jamhuri ya Muungano wa Tanzania na Katibu Tawala Wilaya ya Bunda Ndugu Salum Mtelela mbele ya Mwenge wa Uhuru, mara baada ya kufungua miradi 8 na kiongozi wa Mbio za Mwenge wa Uhuru Kitaifa mwaka 2025, Ndugu Ismail Ali Ussi baada ya kuwasili katika Halmashauri hiyo.

Mbio hizo zilianza kukimbizwa mara baada ya Mwenge wa Uhuru kupokelewa na Katibu Tawala Mkoa wa Mara Ndugu Gerald Msabila Kusaya mapema leo Halmashauri ya Mji wa Bunda ukitokea Mkoani Simiyu.

Awali katika makabidhiano ya Mwenge wa Uhuru baina ya Mkoa wa Mara na Simiyu, Katibu Tawala Mkoa wa Mara Ndugu Kusaya amewakaribisha wakimbiza Mwenge wa Uhuru katika Mkoa wa Mara maana Mara ndipo alipozaliwa muasisi wa Mwenge wa Uhuru na Baba wa Taifa letu Mwalimu Julius Kambarage Nyerere.

Katika Halmashauri ya Mji wa Bunda Miradi yenye thamani ya zaidi ya shilingi bilioni tatu katika sekta za elimu, afya, barabara, maji, mapambano dhidi ya rushwa na kituo cha mafuta cha NM imefunguliwa.