Ianzishwe Mamlaka ya Usimamizi wa Ziwa Victoria

Posted on: December 24th, 2025

Mkuu wa Mkoa wa Mara Mhe. Kanali Evans Alfred Mtambi leo tarehe 22 Disemba, 2025 amempokea Waziri wa Mifugo na Uvuvi Mhe. Balozi Dkt. Bashiru Ally Kakurwa na Naibu Waziri wa Mifugo na Uvuvi  Mhe. Ng’wasi Damas Kamani na ameiomba Serikali ianzishe kwa haraka Mamlaka ya Usimamizi wa Ziwa Victoria.

Akizungumza wakati wa mapokezi hayo, Mhe. Mtambi amesema Mamlaka hiyo itasimamia uhifadhi na udhibiti wa shughuli zote zinazofanyika ndani ya Ziwa Victoria na hivyo ziwa hilo kupata usimamizi endelevu.

“Kwa sasa kila taasisi inafanya udhibiti na usimamizi kivyake na hamna taasisi moja inayowaunganisha na kuziratibu shughuli za taasisi nyingine za Serikali ndani ya Ziwa Victoria” amesema Mhe. Mtambi na kuongeza kuwa Mamlaka hiyo itaratibu sheria mbalimbali zinazolenga kulihifadhi Ziwa Victoria kwa kuzisimamia kwa ukaribu.

Mhe. Mtambi amesema kwa sasa changamoto kubwa ya ziwa hilo ni uhalifu unaofanyika katika ziwa, uvuvi haramu, magugu maji, uhifadhi wa mazingira ya Ziwa na kuongeza kuwa cchangamoto hizo zinaweza kupunguzwa kwa kuanzishwa kwa Mamlaka hiyo.

Kanali Mtambi amesema kwa kuwa Mamlaka hiyo itasimamia sheria na kukusanya maduhuli yanayotokana na Ziwa Victoria, Serikali haitapata gharama ya ziada ya kuiendesha mamlaka hiyo na badala yake Mamlaka hiyo inaweza kuchangia fedha katika Mfuko Mkuu wa Serikali kama zilivyo Hifadhi za Taifa hapa nchini.

Wakati huo huo, Mhe. Mtambi amemuomba Mhe. Waziri kufuatilia mradi wa utengeneza wa chakula cha samaki na uzalishaji wa vifaranga vya samaki katika Kituo cha TAFIRI kilichopo Sota, Wilaya ya Rorya ili wafugaji wa samaki katika vizimba katika Mkoa wa Mara waweze kupata chakula cha samaki kwa urahisi.

“Kwa sasa wafugaji wa samaki katika vizimba wanapata chakula kutoka mikoa na nchi jirani kwa gharama kubwa lakini kiwanda hiki kikikamilika kitawawezesha wafugaji kupata chakula kwa urahisi” amesema Mhe. Mtambi.

Mhe. Mtambi amesema Mkoa wa Mara umewahamasisha sana wananchi kufuga samaki kwa njia ya vizimba hata hivyo wafugaji walioitikia wito huo wanakutana na changamoto ya bei za chakula cha samaki jambo ambalo linarudisha nyuma juhudi za Serikali kuhamasisha uzalishaji wa samaki kwa njia ya vizimba.

Akizungumza katika mapokezi hayo, Mhe. Kakurwa amesema suala la kuanzisha taasisi ya kudhibiti shughuli za kwenye maziwa na mito mikubwa Serikali imeliona na limo katika Ilani ya Uchaguzi ya Chama cha Mapinduzi ya mwaka 2025/2030 na Wizara imeanza kulifanyia kazi na tayari andiko la kuanzisha mamlaka hiyo lipo tayari linasubiri kupitishwa na vikao mbalimbali.

Aidha, Mhe. Kakurwa ameiagiza TAFIRI kuwasilisha taarifa za mradi wa kutengeneza chakula cha samaki Ofisi ya Mkuu wa Mkoa wa Mara kabla hajahitimisha ziara yake ili maamuzi yaweze kuchukuliwa kwa haraka.

Mhe. Kakurwa ameahidi ushirikiano baina yake na Mikoa na Serikali za Mitaa ili kufanikisha utekelezaji wa majukumu ya Wizara hiyo katika kuimarisha sekta za mifugo na uvuvi.

 Katika ziara hiyo, Mhe. Kakurwa ameambatana na Naibu Waziri na Maafisa mbalimbali kutoka Wizarani na Taasisi zilizo chini ya Wizara hiyo.