Mtambi afanya ziara Butiama

Posted on: January 20th, 2026

Mkuu wa Mkoa wa Mara Mhe. Evans Alfred Mtambi leo tarehe 19 Januari, 2025 amefanya ziara katika Wilaya ya Butiama ambapo ametembelea Mgodi wa Bernard Kitamala uliopata usaidizi wa kiufundi kutoka Kampuni ya Shoucheng (T) Co. Ltd kutoka China.

Akizungumza baada ya kupokea taarifa ya mgodi huo, Mhe. Mtambi ameuongeza mgodi huo kwa kupanga kuanzisha Kiwanda cha kuchenjua Dhahabu ambacho kitatumika pia na wachimbaji wadogo wa madini waliopo katika eneo hilo kuchenjua dhahabu zao.

“Ninawapongeza sana kwa kuanzisha kiwanda cha kuchenjua dhahabu, najua hii itawasaidia wachimbaji wadogo wa eneo hili kupata sehemu ya jirani ya kuchenjua dhahabu zao” amesema Mhe. Mtambi.

Mhe. Mtambi amewataka Watanzania waliomo katika mgodi huo kujifunza kutoka kwa raia wa Kichina namna bora ya uchimbaji na uendeshaji wa migodi ya dhahabu ili hata wakiondoka waweze kuendeleza mgodi huo au kuanzisha migodi mingine kwa urahisi.

Kanali Mtambi amewataka wananchi na viongozi wa Kata ya Butiama na Kijiji cha Rwamkoma kuwapokea wawekezaji hao na wengine watakaojitokeza kuwekeza katika maeneo hayo na kuishi nao vizuri ili kuwavutia wawekezaji zaidi kuja katika Mkoa wa Mara.

“Wawekezaji hawa wanamanufaa makubwa sio tu kwa Serikali kukusanya kodi bali pia wanaweza kuongeza nafasi za ajira rasmi na zisizo rasmi, kukuza biashara nyingine na kuboresha huduma za jamii katika eneo hili” amesema Mhe. Mtambi.

Akiwa katika eneo hilo, Mhe. Mtambi amepokea taraifa ya mgodi huo, amekagua maeneo mbalimbali ya mgodi huo na kuzungumza na wananchi kabla ya kukata utepe kuashiria kuanza rasmi kwa shughuli za uchimbaji katika mgodi huo.

Katika ziara hiyo, Mhe. Mtambi pia na msafara wake walishiriki ibada na zoezi la kuaga mwili wa marehemu Mathias Marwa Chuchu aliyekuwa mchimbaji wa madini katika Mgodi wa IRASANILO unaomilikiwa na wachimbaji wadogo.

Aidha, Mhe. Mtambi ametumia fursa hiyo kuwahamasisha wazazi na walezi kupeleka watoto shuleni na wananchi kuahakikisha wanawake wajawazito wanahudhuria kliniki na kutumia mfumo wa M-MAMA ili kuwarahisishia wanawake wajawazito na watoto wachanga wanaougua kwenda hospitali.